El presidente de la Cámara de Representantes d’Estaos Xuníos, el republicanu John Boehner, aconceyó esti xueves a los congresistes del so partíu invitándolos a afrontar la cuestión central de la reforma migratoria.

Asilaos nun hotel del estáu de Maryland nun aconceyamientu de tres díes a puerta trancada, los dirixentes del partíu republicanu tan diseñando les grandes llinies de la campaña de mediu mandatu del 2014 y dalgún puntu d’alcuentru coles polítiques del presidente Barak Obama.

Portavoces del bandu conservador señalaron durante la selmana qu’avanza la idea de promover dalgún tipu d’estatutu llegal (pero non de ciudadanía) para los alredor d’once millones d’indocumentaos que viven nos Estaos Xuníos.

Los dirixentes conservadores son conscientes de la necesidá d’una reforma y que la so postura política se traduxera nuna falta d’apoyu políticu per parte de la comunidá hispana con derechu a votu.