Xina negóse güei a renovar el visáu y oblidó al corresponsal de The New York Times Austin Ramzy a abandonar el país, nuna midida que los diplomáticos consideren ye una represalia poles revelaciones del periódicu sobre la riqueza de la familia del ex primer ministru Wen Jiabao.

El periodista estadounidense, de 39 años, confirmó pol teléfonu dende l’aeropuertu que taba a puntu d’abordar un avión a Taiwán, ande llegó hores más tarde. Ramzy ye’l segundu periodista de The New York Times que ye expulsáu de Xina en 13 meses. Depués de les sos primeres informaciones en 2012 sobre la fortuna de la familia del entós primer ministru yá tuviera de dise en circunstancies asemeyaes Chris Buckley va xusto un añu. Agora mesmo informa sobre Xina dende Hong Kong. Tamién Ramzy va siguir informando pal Times dende la rexón.

El gobiernu americanu intercedió hasta l’últimu momentu a favor de Ramzy, ensin éxitu. Durante la so visita a Pekín n’avientu, el vicepresidente Joe Biden falara del tema del periodista, asina como d’otra docena de corresponsales del Times y de la axencia Bloomberg. Esta última informara sobre la fortuna de la familia del presidente Xi Jinping. En tolos demás casos soluionóse’l problema del visáu.

Tres de les informaciones sobre les families de la cúpula dirixente en 2012, nin el diariu nin l’axencia Bloomberg pudieron cubrir les sos places llibres en Xina. Les sos webs tan amás bloqueaes nel país. L’ex corresponsal en Xina Philip Pan lleva cásique dos años esperando poder asumir el puestu de xefe de la oficina de The New York Times en Pekín.