La Cámara de los Comunes británica votó güei a favor d’otorgar poderes al Gobiernu de David Cameron pa desaposiar la ciudadanía británica a sospechosos de terrorismu nacíos fuera del Reinu Xuníu.

Los diputaos, por una mayoría de 297 votos frente a 34, aprobaron una enmienda de la ministra del Interior, Theresa May, al proxectu de llei d’inmigración, presentada ayeri a última hora nun esfuerzu p’aplacar al sector tory, que reclama midíes más dures na nueva llexislación.

Una vez s’apruebe la llei, esa modificación va permitir desaposiar el pasaporte británicu a tou individuu naturalizáu, pero nacíu fuera d’esti país, que seya sospechosu de cometer dalguna conducta gravemente perxudicial pa los intereses vitales del Reinu Xuníu, según indicó la citada ministra.

Arriendes, los diputaos rechazaron durante esta mesma sesión na Cámara de los Comunes, por 241 votos frente a 97, una controvertida enmienda presentada pol representante conservador Dominic Raab, que xeneró debate nes últimes selmanes.

Según esta enmienda, los delincuentes convictor nacíos nel extranxeru que cumplieran nel Reinu Xuníu más d’un añu de cárcel podríen ser deportaos al so país d’orixen a menos qu’ellí s’enfrenten a amenaces de tortura o muerte. Los detractores d’esa iniciativa alegaben qu’ello podría contravenir la llexislación europea. Esta enmienda fracasó gracies a la oposición del Partíu Llaborista y de los lliberaldemócrates, sociaos de los conservadores na coalición de Gobiernu