El cantante Pete Seeger, una lleenda de la música folk americana, falleció güei a los 94 años d’edá. La so influencia ye descomanada, dende los mesmos Estaos Xuníos, onde Bod Dylan se considera’l so heriede diredctu hasta Bruce Sprinsteen que-y dedicó va nada’l so trabayu We Shall Overcome: The Seeger Sessions, hasta Asturies, onde formaciones como Madreselva, nos años 60, o l’Asturiana Mining Company, a finales de los noventa, recibieron la so influencia o interpretaron canciones d’él.

L’autor d’éxitos como “If I had a Hammer” morrió de causes naturales nel Hospital Presbiterianu de Nueva York nel que llevaba internu una selmana. Esti cantar, xunto a otros como “Where have all the flowers gone” –escrita xunto a Woody Guthrie-, son güei clásicos del repertoriu estadounidense y cuenten con versiones en bien de llingües del mundu, como la que fizo de la primera d’elles Víctor Jara.

Invlucráu na llucha polos derechos civiles y escontra la guerra de Vietnam, Seeger ye consideráu ún de los pioneros de la música folk, xunto col so amigu Guthrie. Seeger popularizó l’himnu del movimientu de defensa de los derechos civiles, “We Shall Overcome”.

Nun conciertu pa cellebrar el so 90 cumpleaños, Bruce Springsteen lu presentó nel Madison Square Garden como “l’archivu viviente de la música y la conciencia de los Estaos Xuníos, un testamentu del poder de la música y de la cultura pa impulsar la hestoria”.

Bien de musicólogos entienden que, ensin laporte fundamental de Pete Seeger, la música folk moderna nun sedría lo mesmo. Más que nada, nel sentíu de convertir la música tradicional na expresión de los problemes presentes del pueblu. Una herencia que recoyeron n’Asturies formaciones como Nuberu, nos años setenta, y que llegó hasta los nuestros díes con versiones de los sos cantares nes voces de los hermanos Valle Roso o d’Imanol Núñez.