Zac Efron encarna al vetiañeru del sieglu XXI que, atemorizáu por sentimientos que lu faen sufrir y lu allonxen del círculu de confor de los sos amigos, métese en llíos y vive “That awkward moment”, comedia romántica na que les nueves tecnoloxíes obstaculicen y revuelven estos tiempos pal amor.

A Efron pasóse-y la época del institutu y yá lleva tiempu percorriendo con éxitu’l cine independiente, depués de papeles en “A cualquier precio” y “The paperboy”. A los sos 27 años tien d’aprender a comprometese col amor nesti filme que s’estrena nos Estaos Xuníos esti vienres que vien.

L’ídolu adolescente que cantaba y baillaba como los ánxeles en “High School Musical”, anque yá tien maurecío como actor y como persona, tamién se fai un enguedeyu al falar d’amor, d’esti “momentu delicáu” al que fai referencia’l títulu de la película.

“That awkward moment” ye’l debú na dirección de Tom Gormican y xuega coles regles básiques de la comedia de situación del Hollywood doráu y actualízales con una nueva engarraza de xéneru: la muyer tien conquistáu’l tarrén profesional pero l’home tovía s’acoruxa ante les tribulaciones del amor.

Cola figura del machu dominante socialmente menos aceptada, ahora son los hipsters, los sensibles con gafes los que tan teniendo éxitu. Xunto col arguyu viril, el despiste xeneracional y les nueves tecnoloxíes, la desixencia d’una sociedá cada vuelta más rápida y centrada no profesional, especialmente nel Nueva York nel que s’ambienta la película, ye’l cuartu elementu que fai que la vida diaria dexe pocu espaciu pa detenese a mirar y curiar l’amor.