El lladrón qu’entregara de forma anónima unes cintes robaes, por mor de les que la policía fue quién a detener a un pederasta en Jaén, entregóse de forma voluntaria, según indicó la Policía Nacional.

El yá conocíu como “bon lladrón” nes redes sociales, ye un mozu de venti años con antecedentes por robu y lesiones al que la Policía tenía identificáu y buscaba dende va tiempu. Según fontes policiales, los axentes personáronse na so casa en varies ocasiones pero nun yeren a dar con él, hasta qu’ayeri pela tarde, aconseyáu pol so abogáu, entregóse en comisaría.

Yá pasó a disposición xudicial acusáu d’un robu con fuerza, precisamente ante’l mesmu xuzgáu que lleva’l casu del pederasta, que s’alcuentra na cárcel dende’l 19 d’avientu pasáu como presuntu autor d’abusos y agresiones sexuales a, cuanto menos, cuatro menores d’edá, ente ellos un adolescente de 16 años que llevaba dende los 10 sufriendo estes práctiques. La Policía aseguró que la so obligación yera detener a esta persona al marxen de los otros fechos, como ye’l d’investigar toles denuncies que se presenten.

Too esto entamara con una llamada anónima’l 15 d’avientu dende un teléfonu públicu a la sala del 091 de la comisaría de Jaén, na qu’una persona dicía que tenía nel so poder varies cintes con conteníu pederasta y que le dexara debaxo d’un vehículu aparcáu na cai.

En nada, una patrulla de la Policía Nacional localizaba debaxo del coche un sobre marrón que contenía tres cintes de videu y una nota na qu’escribiera: “Tuve la desgracia de que cayeran estes cintes nes mios manes y véome na obligación de presentales dexando que vustedes faigan el so trabayu y puean meter a esi fíuputa na cárcel de per vida”.

Topara con elles al entrar a robar nun domiciliu el 6 d’avientu, delitu que fuera denunciáu pol dueñu y presuntu pederasta, que nada dixo de que xunto a dellos pequeños ellectrodomésticos robáran-y una cámara videu y unes cintes.