La cantadora Anabel Santiago va abrir esti sábadu 25 de xineru’l Festival de Tona ay Más, una cita na que delles de les principales voces de la canción asturiana de los últimos años van dexar constancia del so bon facer cola tonada y con otru de los xéneros que más-yos presta interpretar. Asina, vamos tener la oportunidá de sentir tangos, flamenco, coples, xotes aragoneses, habaneres y canciones pop.
Pel escenariu del Auditoriu Teodoro Cuesta de Mieres del Camín, a partir de les 19:00h. diran pasando, xunto a Anabel Santiago, los cantadores Sara Cangas, Silvia Suárez, Vicente Prado “El Pravianu”, José García “Che de Cabaños”, José Manuel Robledo “Lolo Cabranes”, José Antonio González “Cantu la Vara”, Avelino Fernández Corte, Rogelio Suárez, Juan Robledo y Jesús Alonso.
Esta gala, organizada pola Asociación Güeria de San Xuan en collaboración cola conceyalía de cultura del Ayuntamientu de Mieres, va ser presentada por la turonesa Sonia Fidalgo y el mierense Alberto Cienfuegos “Michel”, y va ser grabada por programa Sones de TPA pa la so posterior emisión.
Asina, el programa d’actividaes paraleles de l’Asociación Güeria de San Xuan, organizadora del XVII Concursu Cuenca del Caudal, complétase asina con un gran festival, depués del programáu va quince díes dedicáu a les voces más moces de la canción asturiana y a les escueles de canción asturiana nes qu’estudien y se formen.
