Una de les dos flashmob que llevaron al acabu los miembros de la Orquesta de Cámara de Siero (OCAS) en Atenas esti branu pasáu acaba de convertise nun fenómenu nes redes sociales, depués de que se colgara en YouTube esta mesma selmana.

Va dos díes, la televisión griega faló d’ella pa echar en cara al gobiernu’l gastu desmesuráu del ministeriu de turismu del país pa realizar una flashmob turística. Pola contra, comentaba la noticia, la flashmob del grupu de cámara asturianu nun costara nada y tenía enforma meyor realización y meyores comentarios nes redes d’internet.

La noticia saltó a los telediarios nacionales españoles y en malapenes 48 hores sobrepasó les 70 mil visites, como pue comprobase en http://www.youtube.com/watch?v=fzOU_kPhpSc&feature=youtu.be

Pol videu realizáu durante la so xira por Grecia, la productora Jabuba Film, la mesma que grabara les dos flashmob, recibió’l Premiu de la Crítica RPA 2013 al Meyor Videoclip del Añu. Demientres que la Orquesta de Cámara de Siero recibía asinamesmo’l Premiu al Meyor Grupu del Añu.

Jabuba Film ta integráu por un grupu de profesionales del videu y la música, que yá acompañara l’añu anterior a la OCAS na so xira per Marruecos. La flashmob colgada va menos d’una selmana ta convirtiéndose nun fenómenu viral nestos mesmos momentos.