Julio Cortázar tradúxolu al español, Charles Baudelaire al francés. Pero, l’escritor estadounidense yá despertara l’almiración d’una llarga llista d’autores universales: Mallarmé, Dostoievski, Stevenson, Nabokov, Lovecraf, Proust, Borges, Wilde o Víctor Hugo. Güei Edgar Allan Poe celebraría’l 205 cumpleaños, convertíu nun clásicu al qu’inda paga la pena reivindicar.

A Poe considéraselu ún de los grandes maestros del cuentu. Dexó varios postulaos que tovía se mantienen vixentes. Tuvo un dominiu superlativu de tolos xéneros y sentó les bases de dellos como’l policial y la ciencia ficción. Na so novela curtia “Los crímenes de la Rue Morgue” crea la figura del primer detective analíticu, Auguste Dupin, que posteriormente diba inspirar a Vonan Doyle pa la definición de Sherlock Holmes y tola lliteratura policial deductiva inglesa.

La vida de Poe fue cásique tan lliteraria como la so propia obra. Fía d’una actriz inglesa y un actor americanu que facíen d’artistes ambulantes, Poe nació en Boston en 1809. Los infortunios entamaron de la que malapenes tenía dos años: quedó güerfanu tres de la muerte de la so madre hasta que lu adoptó una familia de Richmond. Tuvo seis años de la so infancia en varios colexos d’Inglaterra enantes de tener un breve pasu pela Universidá de Virxinia y otru igual de curtiu pola academia militar de West Point. Yá entós, dicen los sos biógrafos, yera aficionáu al alcohol.

Empezó a escribir dende mozu. En 1833, “Manuscrito en una botella” ganó un premiu qu’otorgaba un selmanariu de Batilmore, colo qu’entamó vender relatos a otros periódicos del país. Y asina tuvo, incluso depués de casar cola so prima Virxinia Eliza Clemm en 1835, cuando ella namás tenía 13 años y él 27.

La obra de Poe tien dellos detalles propios de la so vida. Suel dicise que los sos tormentos influyeron na so escritura. Otra de les grandes característiques de la so obra ye la racionalización de lo irracional. L’escritor escribió dellos relatos fantásticos con una lóxica cásique científica.

Les adicciones de Poe acentuáronse inda más tres de la muerte de la so muyer, víctima d’una tuberculosis. D’ehí n’alantre, enfermó, hasta que morrió dos años depués. Güei la lliteratura honra nél una obra lliteraria que nun muerre.

. (Photo by Hulton Archive/Getty Images)