El Serviciu de Política Llingüística exerce les funciones pa garantizar el derechu de la ciudadanía a dirixise n'asturianu a l'Alministración autonómica

Mientres l'añu 2013, el Serviciu de Política Llingüística traduxo al asturianu o gallego-asturianu 1.727 documentos (que sumen un total de 3.687 páxines). Les traducciones realizáronse a pitición de dellos organismos públicos, como la Xunta Xeneral del Principáu d'Asturies, la Universidá d'Uviéu, la Fundación Príncipe d'Asturies o'l Muséu de Belles Artes.

Arriendes d'ello, continuaron emprestándose a l'Alministración Pública los servicios necesarios de traducción, interpretación y terminoloxía, con cuenta de garantizar que cualquier ciudadanu pueda dirixise n'asturianu o gallego-asturianu a l'Alministración del Principáu, tal como establez la Llei 1/98, de 23 de marzu, d'Usu y Promoción del Bable/Asturianu. D'esta miente, si un ciudadanu presenta un documentu redactáu n'asturianu o en gallego-asturianu, esi documentu puede ser deriváu al Serviciu de Política Llingüística pa la so traducción, faciendo posible que siga cola axilidá necesaria la tramitación alministrativa correspondiente.

Mientres la presente llexislatura, el Serviciu de Política Llingüística ye l'encargáu d'efectuar cualesquier traducción asturianu-castellán pa la que lu requieran, tanto los poderes públicos nel exerciciu de les sos competencies como los órganos consultivos y asesores del Principáu d'Asturies en materia d'usu y promoción del asturianu. Coles mesmes, asume toles funciones relatives a la traducción, interpretación o terminoloxía del gallego-asturianu.