El Gobiernu reconoz al presidente voceru del Grupu d'IX, Cayo Lara, que'l denomináu Plan d'Educación Financiera, una iniciativa conxunta puesta en marcha'l pasáu añu pol Bancu d'España y de la Comisión Nacional del Mercáu de Valores (CNMV), tien ente los sos fines la educación financiera pa la xubilación y nel ámbitu del seguru, coles mires de concenciar a la población de la necesidá de previsión de la xubilación y fomentar la cultura aseguradora’, pero tou ello al traviés de planes privaos y ensin facer mención dalguna a los retayos yá executaos pol mesmu Gobiernu de Mariano Rajoy nes pensiones públiques de cara al futuru.

Asina consta nel escritu que l'Executivu dirixió a Lara en respuesta a la entruga parlamentaria qu'ésti-y dirixió'l pasáu noviembre, na que s'interesaba tamién sobre si Moncloa comparte “el propósitu del Plan d'Educación Financiera de fomentar la percepción infantil de que los servicios públicos han  ser necesariamente privaos”.

El Gobiernu reconoz qu'esti Plan “financiase con recursos del Bancu d'España y la CNMV, los organismos que soporten el costu de les actividaes desenvueltes nel ámbitu de dichu Plan”, que tien una duración prevista hasta 2017. Sicasí, l'escritu del Executivu del PP dexa ensin responder la primer cuestión directa plantegada por Cayo Lara que yera “¿Cuál ye'l costu del Plan d'Educación Financiera?”

No que sí s'esplaya la respuesta de los responsables económicos del Gobiernu de Rajoy ye n'esponer que “el fin últimu del Plan ye ameyorar la cultura financiera de la población, con cuenta de que los ciudadanos adopten decisiones financieres afeches a les sos característiques personales y familiares y a les sos necesidaes y mires, favoreciendo una meyor xestión de los riesgos y una mayor estabilidá del sistema financieru”.

A tenor de la respuesta recibida, Lara señala que “resulta sorprendente y hasta cínico que'l Gobiernu entienda la necesidá de ‘ameyorar la cultura financiera de la población’ con vista a ‘una mayor estabilidá del sistema financieru’ como señalen. Demuestra qu'a quien nos gobiernen nun se-yos encendió nenguna sollerta ante un mundu financieru crecientemente agresivu y ante les remortines que dexaron los productos tóxicos. Quien seducieron con hipotecar basura’ y unes preferentes delictives difícilmente van ser capaces agora de ‘vacunar’ a los nuesos fíos contra esos males. Los pirómanos nun pueden actuar al empar de bomberos”.

El Gobiernu ignora tamién na so respuesta entrar n'otres de les entrugues claves plantegaes pol máximu responsable d'IX, ente elles si “¿Considera conveniente'l Gobiernu persuadir a los más nuevos por que contraten planes privaos de pensiones?” o si “¿Tien previstu'l Gobiernu impulsar otru tipu de campañes empobinaes a facilitar a los padres la esplicación a los sos fíos de la importancia que tien que los servicios públicos esenciales, como la Sanidá, la Educación o la Dependencia sían públicos, calidable y con un financiamientu abondu?”

Frente a ello, la respuesta escrita del Executivu vuelve incidir en que ‘el públicu infantil constitúi, por tanto, unu de los segmentos de población a los que se dirixen toa una serie d'actividaes nel marcu del Plan d'Educación Financiera col fin de formar, dende'l puntu de vista financieru, a los futuros adultos que van tener qu'adoptar decisiones rellacionaes coles finances en distintos momentos de les sos vides”.

Cayo Lara valora que de neñu enseñaronme qu'el ‘saber nun ocupa llugar’. Pero nun creo que vaya nesa llínea una iniciativa como ésta y diseñada pa inocular nos nuesos escolares el discursu únicu del capital.

“Hai una obsesión –cavilga Cayo Lara- por controlar la mente de los ciudadanos pa convertinos en pixinos consumidores. Les coses nun se producen por casualidá y si rellacionamos esti Plan cola carta informativa que decidió unviar el Ministeriu d'Empléu y Seguridá Social a los cotizantes mayores de 50 años sobre la mira de pensión de xubilación, queda claro que l'oxetivu final de toes estes casualidaes’ ye que contratemos planes privaos de pensiones, que ye a lo que'l Gobiernu cuando fala textualmente de decisiones financieres afeches’. Acabáramos…”