Afayáronse tres nuevos planetes orbitando alredor d’estrelles nel cúmulu Messier, xirando ún d’ellos en torno a un ximielgu del nuestru Sol, según informa l’Observatoriu Européu Austral, ESO.

L’afayamientu, realizáu mediante’l buscador de planetes Harps que la ESO tien nel Observatoriu de la Silla, en Chile, xunto a otros telescopios alredor del mundu, constutúi un fitu yá que, anque s’alcontraran más de milenta d’estos exoplanetes fuera del Sistema Solar, mui pocos tan asitiaos en cúmulos estelares.

El cúmulu estelar estudiáu alcuéntrase a una distancia de 2.500 años lluz na constelación de Cáncer y nél hai alredor de mediu millar d’astros. Durante l’estudiu descubriéronse tres planetes de los que dos orbiten sendes estrelles asemeyaes al sol, demientres que’l terceru rotaba alredor un astru xigante roxu más evolucionáu.

Los dos primeros planetes tienen un terciu de la masa de Xúpiter y tarden n’orbitar les sos estrelles siete y cinco díes, demientres que’l terceru invierte 122 xornaes y tien una masa mayor que Xúpiter.

Los investigadores comprobaron que’l primeru d’estos xiraba en torno a una de les estrelles más parecíes al Sol afayaes hasta güei, amás de ser el primer ximielgu solar afayáu nun cúmulu d’estrelles que contienen un planeta.