El Premiu Nobel de Lliteratura, Günter Grass, dio por pesllada la so obra narrativa, por mor de la so avanzada edá, tres de marcar a lo llargo de más de mediu sieglu la vida cultural n’Alemaña. Los sos llibros, arriendes de llograr un reconocimientu universal, qu’incluyó’l citáu Premiu Nobel, xeneraron con frecuencia debates que diben más allá de lo estrictamente lliterario.

Dende “El tambor de hojalata” (1959), pol que tuvo de comparecer delantre de los tribunales acusáu de pornógrafu, hasta “Pelando la cebolla”, na que desató un escándalu al revelar pela primer vez que fuera miembru de les SS a los 17 años, Grass xeneró polémiques y polarizaciones.

Les engarraces de Grass fueron siempre viscerales y l’escritor nun les archiva fácilmente como se ve nel fechu de que durante tres décades negóse a da-y declaraciones al diariu Bild y a los otros medios del grupu Springer por mor de la campaña que ficieran nel so momentu escontra l’escritor Hienrich Böll. Grass nun escaez, non solo no que se refier a les sos engarraces personales sinon tamién no referente a la hestoria d’Alemaña, y vivió tamién invitrando permanentemente a los otros a nun escaecer.

El so adiós a la novela –diz qu’a la so edá yá nun pue planificar un periodu de trabayu de cinco o seis años que diba necesitar pa escribir una- pue nun significar necesariamente’l so adiós a la lliteratura. Quéda-y la poesía, un xéneru que pue siguir cultivando a curtiu plazu y que, como él mesmu dixera en bien d’ocasiones, enxamás engaña.