Uviéu (E.P.) .-El diputáu del PP, José Agustín Cuervas-Mons, esixó esti llunes al Gobiernu rexonal esplicaciones sobre la xestión del hotel Reconquista d'Uviéu per parte d'Hostelería Asturiana HOASA, empresa del Gobiernu d'Asturies que nel 2009 firmó un contratu con cadena Melia, modificáu n'ochobre del 2013.
Cuervas-Mons indicó que según los pliegos d'esi cambéu firmáu nel 2013 "nesti momentu esa xestión costó polo menos un millón d'euros a los asturianos", cantidá que se recueye como "compensación de deudes".
En rueda prensa'l diputáu del PP indicó que'l so grupu yá pidió la comparecencia en sede parlamentaria del Director Xeneral de Turismu, Julio González Zapico, pa que "esplique de pe a pa" una xestión "que demuestra, según los sos resultaos, que nun foi mui correcta".
En mayu del 2013 la sociedá que xestiona l'hotel incorporóse al primer paquete de reformes del sector públicu autonómicu, estableciéndose que'l Gobiernu tien que proceder a contratar la xestión integral del Hotel per mediu d'un concursu públicu.
Asina, consideren "imprescindible" que l'Executivu asturianu dexe claro en sede parlamentaria dellos aspectos relacionaos con esi contratu firmáu ente Hoasa y Melia. Nesti sen, los 'populares' van preguntar a qué correspuende esa compensación de deuda de daqué más d'un millón d'euros de los que yá s'abonaron más de 600.000; o si la rescisión del contratu 10 años antes de lo previsto va suponer una indemnización a pagar per parte de los asturianos.
El diputáu del PP esplicó que'l contratu firmáu de primeres ente Hoasa y Melia establecía unes condiciones bien riguroses no referío a la parte económica, polo que ye necesario que dende'l Gobiernu asturianu espliquen si se cumplieron les mesmes y si hubo mecanismos de control.
Cuervas-Mons criticó amás que'l Gobiernu gastara 70.000 euros nel contratu pa la ellaboración del pliegu de condiciones pa la externalización de xestión, cuando "dende los servicios de l'Alministración autonómica ellaboraron pliegos muncho más complexos", sin necesidá de recurrir a gastu.
