La eventual evidencia d’un romance ente’l presidente de Francia, François Hollande, y una actriz ye un asuntu priváu del xefe l’Estáu, según opina la mayoría de franceses consultaos nun sondéu publicáu güei mesmu.

El 77% de los entrugaos pol institutu Ifop pal periódicu Le Journal du Dimanche estimen que se trata d’un asuntu priváu que namás afecta a Fançois Hollande, demientres que’l 23% cuida que la vida privada del presidente afecta a tolos franceses.

El periódicu estima que con estos resultaos constátase una continuidá na forma que tienen los franceses d’apreciar detalles de la vida del xefe l’Estáu y refierse a que sigue la mesma tendencia observada col predecesor d’Hollande, el conservador Nicolas Sarkozy. En 2007, de la qu’ésti anunció la so separación de la so esposa Cécilia, el 89% estimó que’l presidente tenía derechu a una vida privada.

El sondéu publicáu güei realizóse los díes 10 y 11 de xineru sobre una muestra de 1.025 persones depués de conocese que la revista del corazón Closer publicara fotografíes que supuestamente confirmen una rellación ente Hollande y l’actriz Julie Gayet.

El 84% de los consultaos nel sondéu afirma qu’esta revelación nun cambia en nada la opinión que tienen del presidente, anque’l director adxuntu d’Ifop, Frédéric Dabi, aseguró que François Hollande ye tan impopular qu’eso nun cambia nada.