La Dirección Xeneral de Política Llingüística vien de coeditar con Ediciones Trabe la obra Palabres nueves n'asturianu, llibru qu'estudia los neoloxismos del asturianu tomando como referencia testos dixitales periodísticos espublizaos en trés medios mientres los años 2010, 2011 y 2012: Asturies.com, la estaya d'asturianu d'Europa Press y Les Noticies.
El resultáu final del llibru ye l'informe d'esta investigación desendolcada por Ramón d'Andrés Díaz, Vanesa Díaz Fanjul y Sara Gutiérrez Rodríguez baxo'l nome de Proyectu Observatoriu Asturianu de Neoloxía y Terminoloxía (AsturNeo). El métodu de trabayu del estudiu consistió na introducción de los testos nun programa del Institut Universitari de Lingüística Aplicada, especialista na investigación de neoloxismos en tol ámbitu hispanu, que permite rexistrar estes palabres creaes.
Equí pues descargar les páxines 331-334 del llibru, qu'incluyen les conclusiones del Proyectu Asturneo.
