Un documental inéditu d’Alfred Hitchcock sobre l’Holocaustu va ver la lluz a finales d’esti añu o primeros de 2015 tres de décades d’escecimientu nos archivos, informó l’Imperial War Museum de Londres.

El material, que ta siendo restauráu, data de 1945, cuando un amigu pidió al cineasta británicu que lu axudara nun documental sobre los crímenes de guerra cometíos polos nazis. Según The Independent, nel metraxe utilizaron imáxenes procedentes de la lliberación del campu de concentración de Bergen-Belsen, nel norte d’Alemaña. Y, afirma’l rotativu, pal maestru del suspense aquelles terribles imáxenes fueron demasiao: pasaron díes enantes de que Hitchcock volviera al estudiu.

Al final la película enxamás llegó a les sales de cine y desapareció nos archivos. Los aliaos decidieron que pa la reconstrucción alemana nun yera bono confrontar con demasiada fuerza al pueblu col so pasáu.

Nos años 80, el material fue redescubiertu por un investigador estadounidense. En 1984, una parte amosóse na Berlinale, pero’l metraxe que se ta recoimponiendo y restaurando va amosar el documental como’l director y los sos collaboradores lu concibieran.

Trátase d’un llargumetraxe dafechamente potente y conmovedor nel que non solo se ven imáxenes terribles, sinon tamién esperanzadores, añade. Por exemplu, un presu que vuelve a poder duchase o la llucha escontra la propagación del tifus.