La Comisión Nacional francesa d’Información y Llibertaes (CNIL), competente na protección de datos, anunció güei qu’impunxera una sanción de 150 mil euros al xigante Google por nun respetar les regles del país en materia de confidencialidá. El buscador deberá, amás, publicar enantes d’ocho díes na so páxina d’acoyida un comunicáu recoyendo la sanción durante 48 hores.

La multa impuesta a Google ye la máxima prevista pola llexislación francesa pa esti tipu de faltes y la más grande de la hestoria del organismu. La CNIL reprocha al grupu’l non respetu de la llei francesa na so política de protección de datos impuesta en marzu de 2012, cuando decidió fusionar les regles de confidencialidá d’unos 60 servicios que presta, talos como’l buscador tradicional, el de vídeos de TouTube, el corréu ellectrónicu Gmail o’l serviciu de mapes.

Escontra de lo que considera Google, la CNIL estima que los datos recollechaos por estos servicios son de calter personal, polo que tienen de respetase les regles del país. L’organismu reprocha a Google la falta d’información suficiente a los usuarios de les condiciones y finalidá del tratamientu de los sos datos personales.

Arriendes, la CNIL estima que Google nun respeta la obligación d’obtener el consentimientu de los usuarios pa introducir cookies nes sos terminales. Amás, el buscador nun precisa la duración de conservación d’esos datos y otórgase la posibilidá de combinalos ente’l conxuntu de los sos servicios.

La CNIL indicó que les faltes cometíes por Google fueron constataes por 29 organismos europeos de protección de datos y que les conclusiones del so análisis son asemeyaes a les de les autoridaes holandeses y españoles a finales del añu pasáu.