Fue’l musical más costosu de la hestoria de Broadway, pero tamién el que más problemes tuvo a lo llargo del so montaxe y durante les sos primeres funciones. Esti sábadu pasáu, “Spiderman” baxó’l telón pela última vez.

Fuera la producción más cara por mor de los efectos especiales, los más llamativos de tolos que se ficieran enxamás pa una producción musical de Nueva York. Pa ser quién a recuperar los costos de 75 millones de dólares de la puesta n’escena, l’espectáculu tendría d’haber permanecío na cartelera al menos siete años, según cálculu publicáu pol prestixosu The New York Times.

Son too, el Teatru Foxwood anunció yá nel payares pasáu que se diba acabar tres de namás tres años en cartelera. L’interés del públicu fuera abangando col pasar del tiempu. La única salida económica, per agora, podría ser el treslláu del musical a Las Vegas, qu’inda güei se ta negociando.