De güei n’alantre, les restricciones qu’inda s’aplicaben en dellos países de la Xunión Europea a trabayadores de Bulgaria y Rumanía dexen de tener validez, lo que va permitir a estos ciudadanos europeos desempeñar el so llabor profesional ensin necesidá d’un permisu de trabayu en cualuquier Estáu miembru.

Esta midida preocupa a países como’l Reinu Xuníu, que teme qu’una fola d’acabantes d’aportar exerza una presión excesiva sobre’l so sistema de beneificios sociales, un argumentu que la Comisión Europea descarta dafecho y sirvi-y pa pidir que nun s’insufle mieos innecesarios a la xente.

Los nacionales de Bulgaria y Rumanía, que s’amestaran al clube européu en 2007, yá podíen desplazase con llibertá per tola Xunión dende esa fecha, asina como establecese y trabayar ensin permisu en 19 de los 28 Estaos miembros. Sicasí, ocho países comunitarios –Bélxica, Alemaña, Francia, Lluxemburgu, Malta, Países Baxos, Austria y Reinu Xuníu- aplicaben restricciones al movimientu de trabayadores d’estos dos países como midida temporal, demientres qu’España facíalo hacia los trabayadores rumanos.

Estes restricciones nun impidíen, de toles formes, que búlgaros y rumanos trabayaran nos sos territorios si gozaben d’un permisu de trabayu o yeren trabayadores autónomos y en bien de casos, como n’Alemania y Francia, les restricciones fueron retirándose de manera progresiva.

Pola contra, per tanto, de güei n’alantre acábase con tou requisitu especial: rumanos y búlgaros van poder trabayar llibremente en cualuquier Estáu miembru de la Xunión Europea baxo les mesmes condiciones que los trabayadores del país al que vayan.

Con too, el Gobiernu de David Cameron tomó una serie de midides, que tamién van entrar güei en vigor, pa llimitar el réximen de beneficios sociales del que podíen beneficiase hasta agora los ciudadanos procedentes d’otru país comunitariu, pa n’última instancia desalendat la inmigración de la Xunión Europea.

Estremaos estudios amosaron, por exemplu de la OCDE, que la llibertá de movimeintu de trabayadores supón un beneficiu pa les economíes de los países d’acoyida yá que, ente otres coses, suelen contribuyir con impuestos más de los que se beneficien.