Fueos d’artificiu multicolores aventaos dende la torre Sky d’Auckland dieron la bienllegada al añu nuevu en Nueva Zelanda de la que dio ellí la medianueche, demientres miles de persones cellebraron baillando nes cais de la ciudá más grande d’esta nación del Pacíficu sur.
Tamién la bahía de Sydney, n’Austrialia, prenidó col espectáculu de fueos d’artificiu, lo qu’atropó a miles d’espectadores. Les autoridaes de Sydney prometieron que’l renováu espectáculu de pirotecnia diba ser más extravagante qu’enxamás y calcúlase que más de millón y mediu de persones fue quién a velu.
Dubai, onde s’afaya la torre más alta del mundu, ye conocida polos sos lluxos y encantu, y nestas fiesta d’añu nuevu apostó por romper otru récor al crear l’espectáculu pirotécnicu más grande del mundu. Los organizadores illuminaron el llitoral pa reproducir la figura d’un falcón esnalando fechu colos mesmos fueos y que amiyaba a lo llargo de les islles artificiales. Xunto con una descomanada explosión pa recrear l’alborecer y desllumbrar a los espectadores con una bandera de los Emiratos Árabes Xuníos fecha tamién de fueos d’artificiu.
En Xina planteóse facer el contéu regresivu al añu nuevu con espectáculos de lluces en llugares hestóricos, ún na Gran Muralla y otru na costa de Shanghai. Pero, pola contra, na contaminada ciudá de Wuhan, na provincia d’Hubei, nel centru de Xina, les cellebraciones van ser más cencielles porque les autoridaes suspendieron l’espectáculu pirotécnicu y vedaron que se prendieran los fueos nel centru pa evitar que la urbe s’enllene de fumu.
En Xapón miles de persones vistíes con kimonos rezaron, ficieron sonar una campana y aventaron monedes como ofrendes en templos, deseando salú, riqueza y felicidá. Les campanes de los templos sonaron 108 veces, poles 108 causes de sufrimientu d’alcuerdu col budismu y dieron la bienllegada al añu del caballu.
En Corea del Norte un grupu de turistes, ente los qu’había estadounidenses, observó los fueos artificiales na plaza Kim Il Sung, presenciando’l tañíu de la campana Pyongyang.
En Hong Kong los fueos viéronse dende la famosa bahía Victoria, a la vez qu’un cañón de la era coloñal británica disparaba salves pa siguir una tradición instaurada na Segunda Guerra Mundial.
N’Indonesia les cellebraciones del añu nuevu son xeneralizaes excepto na ciudá de Banda Aceh onde los clérigos musulmanes veden tolos actos rellacionaos con esta festividá.
Dubay
Australia
Nueva Zelanda
ma
