Xunto al satélite científicu Aist (cigüeña, n’asturianu) y dos esferes de llocalización a bordu, Rusia llanzó güei con éxitu’l primer cohete espacial llixeru Soyuz 2.1v.

L’aventamientu dende’l cosmódromu rusu de Plesetsk llevóse al acabu a les 16:30 hora llocal (12:30 gmt) tres de múltiples aplazamientos por distintes razones d’última hora, el más reciente esta mesma mañana.

Minutos depués del llanzamientu, el Soyuz 2.1v sacó a la órbita espacial intermedia’l bloque acelerador Volga, que tres de se separtar de la segunda fase del cohete va llevar el satélite y les dos esferes al so destín final en poques hores.

El nuevu cohete portador rusu, compuestu por dos fases y heriede del Soyuz 2.1b, tenía de ser llanzáu pela primer vez al empiezu de 2012, pero’l llanzamientu fue aplazáu depués de que durante los ensayos realizaos n’agostu de 2011 fallara’l motor d’una de les fases del aparatu.

El llanzamientu del satélite Aist a bordu del nuevu cohete, programáu pa la primer quincena del pasáu mes d’ochobre, fue nuevamente aplazáu hasta’l 23 d’avientu pola necesidá de sustituir l’aparatu portador pol so ximielgu. Dichu llanzamientu fue tamién aplazáu, primero’l día 24 y depués el 25, cuando volvió ser suspendíu, nesa ocasión minujtos enantes de la hora prevista.