El grupu La Cirigüeña, númberu ún nes ventes de discos n’Asturies y ún de los que más xente atrái nos sos conciertos nes fiestes populares, va ser esti añu l’encargáu de dar les campanaes na televisión pública asturiana TPA, xunto a la presentadora de la cadena Sonia Fidalgo.

En malapenes un cuartu d’hora de programación previa a les campanaes, l’exitosu grupu va facer les sos característiques bromes con pieces del so repertoriu, Asina, poco enantes de les 12:00 h. últimes de 2013 van reíse de les multes de tráficu de la policía llocal col tema “El paisanu del coche azul marino”. Como tamién a les comides d’estes feches, faciendo una glosa a “Una patata brava”, tema col que va arrancar, tres de les campanaes, el Especial Añu Nuevu preparáu pa la ocasión.

Esti Especial Añu Nuevu va contar con dellos de los artistes más conocíos del programa Sones, entamando con Filandón, el grupu baille y pandereteres que nel sortéu de llotería de Navidá repartieron dalgo más d’un millón y mediu d’euros. Xunto a ellos, la so profesora Silvia Suárez va interpretar l’habanera “Mi madre fue una mulata”, al delláu del guitarrista Rodrigo Sturm.

Tres d’ellos vendrá la formación de música llatina Vuelta Abajo, el dúu Mestura xunto al Coro de Ribadedeva, los monologuistes El Maestru y El Previanu, los cantadores de tonada Andrea Cueli, Andrés Cueli, Lorena Corripio, Ismael Tomás, Liliana Castañón y Pablo Díaz, y el gaiteru Berto Varillas.

En xunto, una manera diferente y mui asturiana de recibir l’añu nuevu, dende les rises que despierten los cantares de La Cirigüeña hasta la música qu’aveza presentar un programa como Sones.