Xixón (E.P.) .-La dirección de la multinacional Tenneco entamó a enviar les cartes de despidu a los trabayadores al traviés de burofax.

   Asina-y lo confirmó esti xueves a Europa Press el presidente del comité d'empresa, Isaac Piñera, qu'aseguró que "yera lo esperao", una vez que la empresa empezara'l pasáu llunes a ingresar dineru nes cuentes corrientes de los trabayadores, preludiu según les sos palabres, de les cartes de despidos que yá tán empezando a llegar esti xueves.

   Piñera señaló qu'ente güei y mañana les cartes llegaríen yá a la totalidá de la plantiya, anunciando un despidu que va ser efectivu'l próximu ún de xineru.

   Asina les coses dende'l comité reconocen que nun queda otra alternativa qu'optar pela vía xudicial pa buscar la nulidá del Espediente de Regulación d'Empléu (ERE) presentáu pola empresa, pese a qu'esperen l'informe que sobre ésti tien d'emitir la Dirección Xeneral de Trabayu del Principáu.

   Y ye que según el presidente del comité, un informe negativu de la Dirección Xeneral de Trabayu podría ofrecer daqué de lluz y ayudar a los trabayadores a torgar el zarru de la planta xixonesa.

   Mañana vienres celebrará una nueva xunta ente responsables d'Industria de la Comisión Europea, el conseyeru d'Industria, Graciano Torre, el secretariu d'Industria del Gobiernu central, Luis Valero y representantes del comité d'empresa. Va ser a les doce del mediudía na Conseyería d'Industria.

   Magar nun principiu nengún representante de la empresa diba acudir a esta xunta, según señaló Piñera'l xerente de la planta xixonesa, Agustín Arrieta, va participar na mesma.

   D'últimes, el presidente del comité d'empresa realizó un llamáu pa que la ciudadanía secunde la concentración que van realizar los trabayadores mañana vienres, a partir de les once y media, na Plaza d'España.