Les contribuciones del sector priváu en Cuba al presupuestu del Estáu aumentaron en 18% nos últimos tres meses, depués de que’l Gobiernu impulsara l’apertura del trabayu autónomu en 2010.

El director d’Ingresos del Ministeriu de Finances y Precios, Vladimir Regueiro, indicó que l’impactu económicu de los llamaos “cuentapropistas”, como se conoz en Cuba a los trabayadores privaos, namás representa per agora un 2% del presupuestu estatal.

Asina, tamién precisó que les empreses estatales mantiénense como les mayores contribuyentes al Estáu. La previsión oficial, sicasí, ye que los “cuentapropistas” y otres formes non estatales de trabayu, como les nueves cooperatives de servicios aprobaes esti añu, van siguir medrando.

Como resultáu d’esta expansión, el Ministeriu de Finances y Precios proxecta pa 2014 ingresos superiores en 12% a los recibíos por concetu tributariu esti añu. Cifres oficiales divulgaes por dichu ministeriu a l’Asamblea Nacional del Poder Popular la selmana pasada señalaron que los tributos del sector priváu van aportar en 2014 un 4% del presupuestu del Estáu. L’apertura y desarrollu del llamáu trabayu por cuenta propia forma parte del plan de reformes del Gobiernu del presidente Raúl Castro pa l’actualización económica de la islla.