Un xoven de los Estaos Xuníos vien de ganar con una inversión de 100€ un Picasso valoráu nun millón de dólares, sorteáu pola Asociación Internacional pa la Salvaguarda de la localidá libanesa de Tiro.

El cuadru ye “L’homme au Gibus” (1914) y sorteóse anueche ente cásique 50 mil persones que participaron na rifa, cola que se llograron recaudar unos 5 millones d’euros. Cada ún de los boletos numberaos costaba 100€. El ganador resultó ser Jeffrey Gonano, de 25 años, empleáu nuna sociedá de seguridá escontra los incendios de Pensilvania.

La presentadora y productora de televisión franco-libanesa Cochin tardó dos años en facer realidá la so idea de mercar un Picasso pa organizar con él una tómbola y multiplicar asina’l so preciu a beneficiu de la ciudá milenaria de Tiro. La iniciativa aportó al cumal anueche na sé parisina de la casa de subastes Sotheby’s, qu’acoyó la operación.

Cochin precisó qu’aquiriera’l cuadru nuna venta en Nueva York y qu’inda tienen que devolver el créitu bancariu que solicitaran pa facese col Picasso. Olivier Picasso, ñetu del artista malagueñu, axudó enforma na promoción de la operación, y fizo posible que los heriedes del pintor autorizaran la operación.