Un violín Stradivarius que fuera robáu a una artista coreana nuna cafetería de Londres en 2010 y recuperáu’l pasáu branu pola policía británica vendióse güei nuna subasta por 1,4 millones de llibres (cerca de 2 millones d’euros).

La casa subastes punxo a la venta l’instrumentu, de 317 años d’antigüedá, que fue alcontráu intactu nuna propiedá del centru d’Inglaterra tres años depués de la so desaparición. L’artista Min-Jin Kym denunciara que-y robaran l’instrumentu demiestres tomaba un café nun llocal cercanu a la céntrica estación llondinense d’Euston.

Un ribunal condenó en 2011 a un home de 32 años, John Maughan, por robar el violín cola axuda de dos mozos de 15 y 16 años, si bien el Stradivarius nun apareció hasta dos años depués. Según l’inspector que dirixó’l casu, los investigadores teníen la convicción de que’l violín permanecía nel Reinu Xuníu, a pesar del tiempu que-yos llevó llocalizalu. Min-Jin Kym utilizaba’l violín, fabricáu en 1696, pa los sos conciertos.