La Big Band de Mieres organiza esti domingu 22 d’avientu un conciertu solidariu destináu a la recaudación de fondos pa la propia banda, como axunda pa l’adquisición de distintos materiales pal desempeñu de la so actividá: partitures, atriles, instrumentos, sordines… y, de ser posible, pa l’adquisición d’una batería de jazz. Esti conciertu va tener llugar nel Auditoriu Teodoro Cuesta de Mieres del Camín, a partir de les 20:00h.

Esta orquesta ta dirixida por Miguel Iglesias, profesor de saxu del Conservatoriu de Mieres, y ta integrada por 18 componentes, cinco saxofones, cuatro trombones y cuatro trompetes, xunto con piano, guitarra, baxu, batería y voz, recuperando’l formatu clásicu de les grandes bandes de swing y jazz.

Pa esti conciertu tienen preparáu un programa de temes clásicos del repertoriu d’estes Big Bands, contando pa esta ocasión tan especial cola participación y collaboración del grupu Skanda, que va tocar dellos temes cola banda, como ficiera pocos díes atrás cuando la grabación del so próximu discu en directo.

Pa collaborar con esta formación nun va haber un preciu definíu d’entrada, sinon que va facese como donación. La cita va ser, arriendes, aprovechada pa realizar una captación de socios pa l’Asociación Big Band Mieres. Xunyo colos conciertos, l’asociación fomenta la promoción d’esti estilu al traviés de la realización de distintos cursos de formación