Hasta’l “Cancionero Musical de la Lírica Popular Asturiana”, d’Eduardo Martínez Torner, tolos trabayos tan integraos por obres populares armonizaes. Con too, ensin perder el so orixen popular, cuenten cola impronta que-yos imprime la técnica musical. Esta interrelación ente’l carácter popular y el cultu va tener especial importancia a lo llargo de los años siguientes nel campu de la tonada asturiana –tamos falando del tiempu de los primeros cancioneros armonizaos, a finales del sieglu XIX. En concreto, cuando de la mano de compositores y músicos como Baldomero Fernández o’l propiu Torner, empieza a trabayase coles voces más destacaes de la época, como Obdulia Álvarez Díaz, La Busdonga, o José Menéndez Carreño, Cuchichi.
La música culta, fuertemente influencia naquelles décades pol final del romanticismu y el movimientu del nacionalismu musical, interfier directamente na música tradicional. Esti fechu dase, per otra parte, nun momentu clave: el tiempu nel que la música dexa de ser tradicional, sensu estricto, pa pasar a ser popular. La popularización de la música tradicional emprima nel momentu nel que la técnica (los medios de reproducción) y los medios de comunicación convierten a determinaes voces y músicos en populares. O seya, que la so música, enantes circunscrita al ámbitu familiar-particular o festivu-ritual, tresciende l’ámbitu y acaba popularizándose.
Esti fenómenu ye simultáneu en bien de partes del mundu. El fado surde en Portugal, el tango n’Arxentina y Uruguay, el samba en Brasil, el rebétiko en Grecia, el blues nel sur de los USA, el son en Cuba, la balada n’Irlanda, el flamenco nel sur d’España... Nun se trata, en nengún casu, de músiques tradicionales, sinon de músiques popularizaes a partir d’una base tradicional. Nel momentu en qu’estes músiques se popularicen los sos intérpretes profesionalícense y delles de les sos interpretaciones combiértense n’éxitos.
Nel mesmu sentíu, surde n’Asturies l’asturianada, a partir de la manera tradicional de cantar tonada asturiana y baxo la mano de compositores como Baldomero Fernández (“Al pasar por el puertu”), Martínez Abades (“Soi asturianín”), Benjamín Orbón (“Torna la gocha”), Amalio López (“A la Pipiona”), Eulogio Llaneza (“Nu hai carretera sin barru”)... y un llargu etcétera qu’aporta hasta los nuestros díes.
