• Los escritores Pablo Rodríguez, Ricardo Candás, Beatriz Redondo, Marisa López y Alfonso Zapico van recoyer los gallardones nuna Gala que va cuntar también cola actuación musical d’Héctor Braga.

El Paraninfu de la Universidá d’Uviéu acueye l’actu d’entrega de los cinco premios lliterarios en llingua asturiana convocaos pola Conseyería d’Educación, Cultura y Deporte nel 2013 cola mira de consolidar, arriquecer y prestixar la llingua y cultura asturiana.

Premiu Xosefa Xovellanos de Novela: Pablo Rodríguez Medina, pola obra Fame d’amor, determín de pasión

A esti gallardón podíen presentase noveles en llingua asturiana de tema, xéneru y estructura llibres, con una estensión mínima de setenta y cinco páxines, siempres que foren inédites y non premiaes n’otros concursos. El xuráu decidió por mayoría conceder el Premiu a la novela titulada Fame d’amor, determín de pasión, destacando “l’esfuerciu narrativu tan sólidu, l’ambición y l’oficiu, amás del usu acertáu de rexistros variaos”. El testu presentóse col seudónimu “Solombres de Casiano”. Al abrir la plica, l’autor ganador resultó ser Pablo Rodríguez Medina.

Pablo Rodríguez Medina (San Andrés de Llinares, Samartín del Rei Aurelio, 1978) ye llicenciáu en Filoloxía Hispánica y especialista en Filoloxía Asturiana pola Universidá d’Uviéu. Escritor n’asturianu y en castellanu, ganó bien de gallardones en dellos xéneros (ensayu, cuentu, novela, teatru, poesía...). Como narrador n’asturianu yá ganare, ex aequo, la edición del añu 2001 del Premiu «Xosefa Xovellanos» cola novela L’arna de San Atanás. Nesti xéneru, amás de la obra mentada, espublizó Los paraísos perdíos (2000), Ente semeyances (2001), Les vueltes, toles vueltes (2002), Los taraos (2003), Perreríes (2007), Vivir ensin probalo (2009), Música d’amor en guerra (2009) y Al aldu la memoria (2010). En poesía, Nel dialeutu del grisú (1999), Tiempu d’esiliu y povisa ayeno (2001), Los desconocedores del agua (2001), El color de l’ausencia (2004), Aires de mudanza (2007) y La edá de los caminos (2009). En teatru, Martema, historia d’una guerra, retratu d’unes culpes (2003), Orbaya (2003), Cantu de gaviotes (2006) y El santu (2009). Tamién cultivó la narrativa xuvenil coles obres Nun blinquen ayalgues (2003), Tapín de Picupáu (2006) y Ello ye too la xente, que nun mos compriende (2008).

Premiu Xuan María Acebal de Poesía: Ricardo Candás Huerta, pola obra Superficie del silenciu

Un xuráu decidió por mayoría conceder el premiu al poemariu tituláu Superficie del silenciu, destacando, según consta nel acta, «la solidez d'una obra unitaria que crea una atmósfera de sensaciones alredor de la memoria, el destín y el presente, estableciendo un diálogu ente la voz y el silenciu». Abierta la plica, l’autor ganador resultó ser Ricardo Candás.

Ricardo Candás (Xixón, 1970) ye llicenciáu en Filosofía pola Universidá d'Uviéu. Llogró dellos premios lliterarios, como'l «Fernán Coronas» (2005), col poemariu Quiciás seya payares; el «Llorienzu Novo Mier» (2010), cola obra Nos díes pensatibles y el «Nené Losada Rico» (2011) col poemariu Naufraxos. Como narrador publicó'l llibru de relatos Les últimes pallabres (2010). Amás, publica davezu en revistes como Formientu o Lletres Asturianes, ente otres.

Premiu Máximo Fuertes Acevedo d’Ensayu: Beatriz Redondo Viado, pola obra Yá cuasi nunca lo facemos por amor. Conciencies mercenaries

Ente les obres presentaes, el xuráu decidió, por unanimidá, conceder el gallardón al testu tituláu Yá cuasi nunca lo facemos por amor. Conciencies mercenaries, destacando que se trata de «una obra bien estructurada que se sirve de la llingua asturiana pa reflexonar sobre un tema relevante y d’actualidá, como ye’l de les relaciones ente poder y medios de comunicación». El testu ganador presentóse baxo’l seudónimu «Perra Tierra». Abierta la plica, l’autora resultó ser Beatriz Redondo Viado.

Beatriz Redondo Viado (El Remediu, Nava, 1976) ye llicenciada en Ciencies de la Información pola Universidá Complutense de Madrid, y en Filosofía (UNED). Redactora y collaboradora en dellos medios de comunicación asturianos (el selmanariu Les Noticies, del que foi directora; les revistes AtlánticaXXII o Muyeres Ateyabana; el periódicu Diagonal Asturies o la emisora Onda Cero Radio), ye autora del llibru xuvenil Qué ye que ye’l Tercer Mundu. Un viaxe del centru a les periferies (Ámbitu, 2004) y coautora xunto con Vanessa Gutiérrez del ensayu documental El país del silenciu (Ámbitu, 2007), que rellata la vida de delles muyeres asturianes nacíes a partir de 1910, centrándose nes sos esperiencies de la Guerra Civil.

La publicación nel selmanariu Les Notícies del reportaxe «El campu asturianu, en víes d’estinción» fíxola acreedora nel añu 2003 del Premiu «Enriqueta González Rubín» de periodismu n'asturianu, otorgáu pol Gobiernu del Principáu d'Asturies.

Premiu María Josefa Canellada de Lliteratura Infantil-Xuvenil: Marisa López Diz, pola obra Tatuaxes nel corazón

Ente les obres presentaes, el xuráu decidió por unanimidá conceder el Premiu al testu tituláu Tatuaxes nel corazón, destacando, según consta nel acta, «l'adecuación temática y formal a la edá de los llectores a la que va dirixida la obra que, amás, avera la lliteratura xuvenil a la modernidá de les nueves tecnoloxíes y elementos gráficos». El testu presentóse baxo’l seudónimu «Montenegro». Abierta la plica, l’autora ganadora resultó ser Marisa López Diz.

Marisa López Diz (Xixón, 1970) ye llicenciada en Filoloxía hispánica y especialista n'asturianu y gallego-asturianu, llingües les dos nes qu'escribe davezu tanto poesía como narrativa. Tien ganao premios lliterarios como'l «Fernán Coronas» (1998), l'«Elvira Castañón» (2001) o'l Premio «Xeira» (2007). Nel xéneru poéticu tien les obres Tiempu de tristura (1998) y A terra esqueicida (2007), n'asturianu y gallego-asturianu respectivamente. En cuantes al xéneru infantil, publicó los llibros Poemes de carambelu (2006), Binoca (2008) y Malva y el pasapallabres (2010). Nel 2012 estrenó'l curtiumetraxe A fiya del xastre. L'otru campu artísticu nel que trabaya ye la música: forma parte del dúu Mestura, col que publicó dos discos, Agua del norte (2006) y Poemes de carambelu (2008), y agora atópase grabando A terra esqueicida, sobre poemes del so llibru homónimu.

Premiu Alfonso Iglesias de Cómic: Alfonso Zapico Fernández, pola obra Cuadernos d’Ítaca

Alfonso Zapico Fernández ganó la 5.ª edición del Premiu «Alfonso Iglesias», al que podíen presentase cómics d’estilu, tratamientu y tema llibres, escritos en llingua asturiana y con una estensión mínima de cincuenta páxines, siempres que fueren inéditos y non premiaos n’otros concursos.

El xuráu, qu’otorgó’l premiu por mayoría, destacó «la profesionalidá que s’amuesa na obra d’acordies coles nueves tendencies europees». El testu presentóse col alcuñu “Capricornio”. N’abriendo la plica, l’autor ganador resultó ser Alfonso Zapico.

Alfonso Zapico (Blimea, 1981) estudió Artes Plástiques y Diseñu na Escuela d’Arte d’Uviéu, y trabaya como profesional gráficu dende l’añu 2006. Fizo ilustraciones, diseños, animaciones y campañes pa delles axencies de publicidá, editoriales o instituciones. Amás, ye ilustrador de prensa en diarios rexonales asturianos (La Nueva España, Cuenca del Nalón…).

Tien publicaos cuatro títulos de cómic (el álbum La guerre du professeur Bertenev y les noveles gráfiques Café Budapest, Dublinés y La ruta Joyce) arriendes de collaborar en delles obres colectives. Nel pasáu añu 2012, Alfonso Zapico ganó’l Premiu Nacional de Cómic, qu’otorga’l Ministeriu de Cultura. Amás, ye ganador del «Prix BD Romanesque Ville de Moulins» (2007), y de los premios «Haxtur» (2008) y «Josep Toutain» (2010). Anguaño vive en Francia, onde trabaya en dellos proyectos de cómic.