Trenta cines de Corea del Sur estrenen güei “Perros y gatos”, la comedia romántica d’un realizador mozu que fizo hestoria al ser el primer llargumetraxe filmáu integramente con un iPhone que s’estrena en sales comerciales.

El director, Min Byung-woo, de 31 años, comentaba na estrena que nun pensaba que la calidá de les imáxenes filmaes pudiera ser tan alta nuna pantalla xigante. Tamién confía dafechamente que’l públicu nun va notar la diferencia ente la obra d’él y cualaquier otra rodada con equipos profesionales.

Min espera que “Perros y gatos”, con un presupuestu que malapenes supera los 10 mil euros, atraiga la curiosidá d’un públicu qu’enxamás nunca viera en cine una película grabada con un smartphone.

L’argumentu de la comedia, basáu nuna experiencia real del director, describe la turbulenta hestoria d’amor que surde tres del alcuentru nun parque ente una artista depresiva qu’adopta un perru caleyeru y un xoven ilustrador qu’afaya un gatu atáu a un bancu y conviértelu nel so compañeru na vida.