L’asturianada nació del encuentru ente los cantadores de tonada y una serie de músicos cultos, músicos clásicos asturianos influenciaos pol movimientu del romanticismu y del nacionalismu musical. Del so trabayu ente los dos, ente los cantadores y los músicos, nació’l xéneru más identificativu de la música asturiana del sieglu XX. Lo que llamamos asturianada.

Na enciclopedia “Asturias”, de Bellmunt y Canella, publicada nos años finales del XIX y primeros del XX, menciónase a los “cantadores de la quintana” como aquelles voces qu’interpretaben la “tonada de la tierra”. El nome de cantador o cantador de la quintana ye’l más tradicional que se conoz pa designar al intérprete de canción asturiana. A lo llargo del sieglu XX esti términu fue cayendo en desusu y malapenes dellos autores siguieron aferraos a la antigua denominación, como fue’l casu de José María Marcilla nos dos tomos del so llibru “Un hito en la historia de la música asturiana”, relacionaos colos premios de canción asturiana del Concursu de Tonada del Teatru Campoamor. Pola contra, nin la propia AICA, Asociación d’Intérpretes de la Canción Asturiana, nin nenguna otra asociación de cantadores, reivindiquen el so propiu nome nes sigles de les sos organizaciones.

Cola denominación “canción asturiana” ocurrió dalgo asemeyao. Tradicionalmente llamósela tonada, tonada de la tierra, tonada arriera o tonada asturiana, pa depués, a primeros del sieglu XX, pasar a ser llamada asturianada.

Nun s’empleó’l términu “canción” hasta tiempos recientes yá que pa definir otros xéneros que nun fueran tonada esistíen nomes propios (como añada, vaqueirada, xiringüelu, fandangu, xirandiya...) o dalgún nome xenéricu del tipu de “cantar”, si se trataba d’una pequeña cancionina, o “hestoria”, si yera dalgún tipu de romance.

Autores como Eduardo Martínez Torner emplearon términos como “canción de ronda” pa referise, en bona parte de los casos, a tonaes. En Cantabria úsase nesti momentu’l féu términu de “canción solista” pa designar al tipu de tonada propiu del llugar que siempre se conociera col guapu nome de “montañesa”. N’otres partes, como L.laciana, L’Altu Sil, Las Oumañas o Babia, sigue llamándose “tonada arrieira”. Na Senabria zamorana a esti tipu de tonada conózsela col nome de “cantar a l’asturiana”.

Otres denominaciones tamién tradicionales, del tipu de soberanes, ayeranes, mariñanes, cabraliegues, carreñanes, xovedines, pravianes... facen referencia a estilos de tonaes, munches veces mui poco o nada definíos.

La tonada brava, la que namás necesitaba la voz, llegó a finales del sieglu XIX cola mesma forma y la mesma grandeza con que seguramente se cantaba n’Asturies mil años atrás. Esta manera de cantar única, al altu la lleva, sin necesidá nenguna d’instrumentu.

De la mesma manera que los cantadores de tonada senabriega nun son nada conocíos, más que nel so ámbitu restrinxíu, de los cantadores de la quintana qu’esistieron mesmo nel sieglu pasáu nun llegaron malapenes noticies. La figura del cantador qu’aportó en Senabria hasta los nuestros díes sírvenos pa entender lo que debió ser la figura del cantador de la quintana asturiana del sieglu XIX. Una bona voz al serviciu de la comunidá na que s’integra, yá que xunto a ella participa nos actos comunitarios más relevantes: les mises mayores, les fiestes, les celebraciones familiares y los momentos d’asuetu nel trabayu y na vida cotidiana. Son grandes voces, pero anónimes, ensin mayor reconocimientu individual que’l que-y da’l so propiu grupu.

Los concursos marcaron la hestoria de la tonada a tolo llargo del sieglu XX. Tovía agora, a primeros del sieglu XXI siguen teniendo una importancia trescendental pa entender la fortaleza del xéneru. Nun esiste nenguna otra actividá musical n’Asturies qu’arrastre un públicu tan fiel. Per otra parte, el públicu de tonada ye’l más grande en númberu. Y vien siéndolo dende los últimos 80 años.

Bienveníu esti proxectu de declaración del Bien d’Interés Cultural er parte del Conseyu de Patrimoniu Cultural. Bienveníu porque ésti, el presente, ye’l meyor de los momentos pa l’asturianada.