Por Ismael González Arias.- Les dos vienen del llatín tonus, acentu, y les dos refieren al cantu tradicional, a la copla de cuatro versos octosílabos, con rima asonante ente’l segundu versu y el cuartu, polo xeneral.
Ye siempre una pregunta obligada: ¿son de la mesma madre les tonaes asturianes y las tonás andaluzas? Cuando non, en vez de pregunta, surde la conclusión rápida, propia de la oreya poco avezada. En bien d’artículos sobre la toná andaluza vincúlasela con Asturies y vicebersa. Como tamién a una montonera d’otros cantes, del tipu del fandangu, la farruca o’l garrotín. Dalgo que tamién n’Asturies ocurre cuando s’emparenta, pola manera de dar les vueltes (los melismes), la tonada ayerana col cante flamenco.
José Blas Vega, autor del llibru “Las tonás”, ye ún de los principales estudiosos y investigador de la toná andaluza y, de manera especial, de la influencia d’esta toná nel orixen y formación de los cantes flamencos d’anguañu. Parte pa ello del fechu de que la toná ye ún de los cantes primitivos y que na so formación intervinieron coples populares diseminaes per estremaos puntos de la xeografía española.
Nel ámbitu asturiana esti tipu de tonaes primitives, de les que bien pue ser cierto que pudieron dir surdiendo dellos de los otros xéneros actuales, encuádrense dientro del apartáu de les tonaes de la tierra. Dos son les característiques más diferenciales que tienen con respectu al restu de les tonaes: la cuarteta sobre la que se canten nun suel repitir nengún de los sos versos y alviértese en bien d’elles la estructura del romance (hestories, como los noma la xente tanto n’Asturies, como Galicia y Lleón, por contar en verdá una hestoria).
L’orixen de la toná andaluza, siguiendo’l llibru de José Blas Vega, afáyase igualmente nos vieyos romances qu’interpretaben los más antiguos cantaores de los que se tien referencia: El Planeta, El Tío Rivas, etc. Hacia l’añu 1770 yá se tien referencies del primer gran cantaor del xéneru, el xerezanu Tío Luís el de La Juliana. A partir d’esti momentu surden dos focos xeográficos, el de Jerez de la Frontera y el del barriu de Triana de Sevilla capital.
La evolución de la toná hacia los estremaos cantes del flamenco ta enforma más documentada que la so pariente asturiana. Asina yá ye hacia 1830 que se sabe del pasu evolutivu de la toná a la siguiriya. D’aquel tiempu vien la tradición de clasificar los diferentes xéneros de tonás: treinta y tres (como los años de Cristu), pa Rafael Martín, cuando escribe’l so métodu de guitarra en 1902; la tradición xitana fala de trenta y una modalidaes; Demófilo dexara descrites con detalle un total de ventiséis; el propiu Blas Vega cuenta ente los vieyos cantaores la hestoria de “las diecinueve tonás”; pasando’l sieglu’l númberu quedó en siete; númberu que queda a mediaos del sieglu XX en tres, la chica, la grande y la del Cristu.
Pero, en xeneral, una característica xunía a toes estes modalidaes de toná: toos ellos yeren cantes ensin guitarra. Depués, según se cantaran na cárcele o nel trabayu acabaron pasando a tener otres denominaciones como carceleras o martinetes. Nomes qu’aportaron hasta los nuestros díes. Lo que nun quita pa que sigamos alvirtiendo baxo ellos estructures d’antigües tonás.
La tonada asturiana, muncho menos estudiada, nun llamó malapenes l’atención siquiera a los estudiosos de primeros de sieglu XX. Mesmo Torner nun les cita siquiera y acaba englobándoles dientro del nome xenéricu de canciones de ronda (nome que se continúa empleando en buena parte del antigüu Reinu de Lleón). En Galicia, onde se siguen cantando, pero algamaron un menor desarrollu, conózselas baxo’l nome de alalás.
La evolución de la tonada asturiana a lo llargo de los últimos cien años nun tá por ello bien estudiada, lo que nun quita pa que s’alvierta al momentu la so evolución gracies a la esistencia de grabaciones dende bien primeros de sieglu. Cuando non dende finales del sieglu XIX, como ye’l casu de les tonaes (pravianes se les llamaba entós) de Antonio Pozo, El Mochuelo, grabaes en cilindros de cera d’Edison.
