Por Ismael González Arias.- El títulu del artículu ye de Miguel Ríos. Sácolu directo del prólogu del llibru “Pop Playu. Los conjuntos músico-vocales en Gijón en la década de 1960”, de Luis Miguel Piñera. Un trabayu de dalgo más de trescientes páxines que vien acompañáu d’un impagable CD con 25 canciones de 13 grupos del tiempu.
La década anterior, la de los cincuenta, viviera marcada pola música llatina y, de manera especial, por Machín. Sobre la influencia d’estes corrientes musicales tresatlántiques ya falara en dellos artículos. El final de la década tuviera marcáu pol twis. El Duo Dinámico yera’l grupu por escelencia. “Oh Carol”, na versión d’ellos, y “El rock de la cárcel”, na de los Ten Tops, abren la dómina. Ye cierto: ya nada diba ser igual.
Una bona manera d’alvertilo ye tirase de cabeza a les páxines del llibru “Pop Playu”. Demientres, de fondo, sintiendo la música d’aquellos años, puesta al día polos sos supervivientes anguañu. Un piñu de xente que, a la manera de Noel Soto, podríen cantar: “Sólo espero que me entiendan / los que han vivido el rock and roll”.
Luis Miguel Piñera consigue, a lo llargo d’un testu amenu y d’una amuesa de fotografíes magnífica, devolvenos los sueños de la xeneración que más vio cambiar el mundu en menos tiempu. Gracies a la creación del primer llinguaxe dafecho universal: el rock (y el so fíu directu, el pop).
Un fenómenu que fizo posible que, al son de “El rock de la cárcel”, compartiendo’l mesmu tiempu que “Campanines de mio aldea”, d’El Presi, ficiera baillar a toa una xeneración dende Singapur a Navelgas, dende San Antonio de Texas a La Calzada de Xixón.
Fue un momentu únicu. Y sigue siéndolo pa analizar como fue posible qu’aquella música que contaba con toles bendiciones de los medios de comunicación y, más que nada, col beneplácitu de la mocedá de la época, nun fuera quién a acabar cola música propia del llugar. La de siempre. La que quedó en vieya en menos d’esa década.
La competencia fue descomanada. La guerra, a muerte. Nun se podía ser modernu y escuchar a Silvino Argüelles. Nun se podía ser mozu y dicir que te prestaba Diamantina Rodríguez. Nun se podía gritar que los tiempos taben cambiando y siguir sintiendo la gaita de Remis Ovaye.
Compitir contra “El rock de la cárcel” de 1960. Contra “Quisiera ser”, del Duo Dinámico, de 1961. Contra “Good luck charm”, d’Elvis Presley, de 1962. Contra “Pregheró”, d’Adriano Celentano, de 1963. Contra “Please, please me”, de The Beatles, de 1964. Contra “A hard Day’s a Night”, de 1965, o “La escoba”, de Los Sirex. Contra “Yesterday”, de 1966, o “Un sorbito de champán”, de Los Brincos. Contra “All you need is love”, de 1967, o “Los chicos con las chicas”, de Los Bravos... datos que nun me fue más que necesario dir entesacando del propiu llibru.
El soníu d’una dómina, al qu’aportamos otra vuelta gracies a les “bones vibraciones” de Los Jaguar’s, Los Bríos, Carlos Fernández-Miranda, Julio Ramos, Cabezudo y Lastra, Los B-3, Los Espectros, Los Sony’s, Los Juniors, Los 2+2, Los Yutang, Los Luke y Los Archiduques que, en rigurosa primicia y a la manera d’agradable sorpresa, incorpora’l llibru como CD. Nun falta nada. Cierres los güeyos y trespórteste al Xixón de los sesenta. Sientes les mesmes foles españando contra la Escalerona, la mesma megafonía rogando a unos padres descuidaos se personen nes dependencies de Salvamentu Marítimu a recoyer al tiernu infante que se-yos perdiera.
