Ismael González Arias.- Vuelve falase cada poco de recuperar el xéneru de la vaqueirada pa compitir nos concursos, al par de l’asturianada o de l’ayerana. El principal problema vuelve ser definir excato que ye vaqueirada o, de cara al xuráu del concursu, que podría entendese por vaqueirada.

La esplicación yera bien cenciella: dende primeros del sieglu XX una llarga riestra de cantadores de tonada incorporaron dellos cantares vaqueiros (o del occidente d’Asturies, dicho con meyor precisión) y llamáronlos vaqueiras o vaqueiraes. Vistos dende fuera, toos esos cantares puen entendese como vaqueiras, pero cada ún d’ellos nun dexa por ello de pertenercer a un xéneru bien determináu (bail.les de pandeiru, sones d’arriba, cariáu, araña, xotes, xirandiyes…).

Asina les coses yera mester indicar a los cantadores la posibilidá de cantar nel Concursu de Vaqueira toa esa bayura de cantares que, a lo llargo del sieglu XX, los cantadores detonada fueron incorporando al so repertoriu. Como tamién, aquellos otros que, dellos cantadores d’anguañu, por ser propios de la zona o por contar con conocimientos del tema, cuidaran incoporar como vaqueiras.

Pa que’l Xuráu y los propios cantadores tengan un marcu al qu’acoyese señálaense, polo xeneral, les siguientes variantes como posibles vaqueiras que poder interpretar dientro del Concursu:

1.- Aquelles vaqueiraes que combinen carácter llibre y rítmico, y que de manera tradicional vienen interpretando como tales los cantadores de tonada. Ex. “Vaqueiras”, de Juanín de Mieres; “Esti pandeiru que toco”, de Agustín Argüelles; “Vaqueiras”, de Cuchichi.

2.- Cualaquier vaqueira tradicional de ritmu ternariu, propia del folclor vaqueiru (ganaderu o arrieru), xaldu (llabrador o villanu) o marnuetu (paisanu de la marina). Ex. “Vaqueiras”, de Diamantina Rodríguez.

3.- Cualaquier vaqueira tradicional de ritmu llibre, propia del folclor citáu nel puntu 2. Ex. Les “Vaqueiras”, de Juan Uría Maqua; “Vaqueiras de Torner”, de Cuchichi.

4.- Cualaquier xirandiya de ritmu ternariu, propia del folclor citáu nel puntu 2. Ex. “Giraldilla”, de Diamantina Rodríguez; “Vaqueiras de Cabrales”, de Cuchichi.

5.- Cualaquier bail.le de pandeiru de ritmu ternariu, como la media vuelta, el cariáu, l’araña, el regondixu… propios del folclor citáu nel puntu 2.

6.- Cualquier son d’arriba o bail.le l.lano de ritmu ternariu, propiu del folclor citáu nel puntu 2. Ex. “Muncho quixera tener”, de Rosario González.

7.- Cualquier xota de ritmu ternariu, propia del folclor citáu nel puntu 2. Ex. “Giraldilla de Torner” y “Giraldilla del puertu”, de Diamantina Rodríguez.

8.- Nun se considerarán aptes pal concursu les asturianaes, anque citen temes vaqueiros, como por ex. “Vaqueirinos del Gumial”, de José Requejo. Nin tampoco aquelles otres xirandiyes, fandangos, pasudobles… ayeenes al folclor citáu nel puntu 2.

¿Cuántos d’estos cantares nun son propios de los vaqueiros? De xuru que bien d’ellos. Pero, ¿cuántos d’estos cantares nun son propios de la tierra que triaron los vaqueiros? De xuru que nengún.

La pregunta tendría de ser: ¿quién son vaqueiros? O meyor: ¿qué tierra ye la vaqueira?, si de verdá esiste dalguna tierra que se puea llamar vaqueira. De xuru qu’esti comentariu míu da pie a dalgún comentariu adicional. Ye lo mínimo depués de visitar el Muséu Vaqueiru de Naraval: ¡un muséu vaqueiru nuna casa xalda! O, lo que ye lo mesmo: ¿viviría dalguna vez dalgún vaqueiru en Naraval?