El coordinador d'IX, Manuel González Orviz, criticó esta mañana duramente la reforma del Ministru Wert, pos, dixo, “ye una llei nacional-catolica, como la de la dómina na que nós educamos, nel períodu franquista y, amás, ye una llei clasista y segregadora”.

Pela so parte el coordinador de la área de Mocedá d'IX, David Leis, recordó que la so formación yá participara viviegamente nes movilizaciones convocada tantu por sindicatos como por organizaciones estudiantiles contra la reforma y que van caltener el refugu. “Agora vamos dar un pasu más y vamos llanzar una batería de midíes pa crear una alternativa a l'actual llei que ye reaccionaria y que nos lleva hacia tras”. La campaña que se propón, impulsada dende la área d'educación d'IX, pretendi ser inclusiva, abriendo les acciones a otres organizaciones. “Queremos cuntar con tola comunidá educativa, tanto padres, estudiantes, trabayadores y profesores”.

Leis esplicó que va ser una campaña “en positivu” y “pedagóxica”, na que se va esplicar lo negativo de la llei, sinón que, amás, va favorecese una alternativa a la reforma.

La campaña, añedió González Orviz, va ser de “desobediencia civil” porque, dixo, “ye una forma tamién de garantizar los derechos democráticos con un Gobiernu qu'a la fin lo que fai ye retayar derechos, retayar democracia y, sobremanera agora, cola Llei de Fuelga y Seguridá Ciudadana, instaura la represión. Poro, la desobediencia civil ye fundamental”.

P'Alejandro Fernández, de la área d'Educación d'IX, a pesar de que la reforma educativa yá foi aprobada pol PP nel Parlamentu Nacional, ye imprescindible caltener les movilizaciones. “ Ye necesariu siguir combatiendo y siguir na cai y nes Instituciones con tolos medios del Estáu de Derechu que tenemos a favor pa esti tipu de campañes”.

Alejandro Fernández coincidió con González Orviz y Leis nel calter clasista de la reforma, que respuende a los intereses de clase del gobiernu del Partíu Popular.

“Nós, tamién dende una posición de clase, tamién, tenemos de combatir esa llei, agora con esa campaña de insumisión”.

L'oxetivu ye garantizar una educación pa toos y toes.