González rellató como'l Partíu Popular propunxo al entamu de la xunta, al pie de Foro Asturies y UPYD el refugu del calendariu propuestu pol Presidente de la Cámara y la so tramitación per vía ordinaria, lo que significaba que les votaciones realizaranse nel mes de xineru y mentanto la comunidá autónoma entraría en situación de prórroga presupuestaria y l'impuestu de patrimoniu nun podría computase hasta 2015. Dempués d'un recesu y xuntes col Conseyeru de Presidencia, el PP camudó de posición y volvió a un calendariu prácticamente igual al propuestu al entamu de la xunta.

“Ye la escenificación d'un alcuerdu. Quien teníen duldes de cómo diba ser el presupuestu d'Asturies güei yá nun les debe tener”, alvirtió'l voceru d'IX, dempués, amás de que'l Delegáu del Gobiernu saliera prácticamente felicitando a Javier Fernández por aplicar la política de Rajoy. De la mesma, recordó les declaraciones de Mercedes Fernández qu'aseguró que'l PP aspira a axustar y aldericar enmiendes parciales. “Eso, como tol mundu sabe significa que pa llegar ende ríquese que les enmiendes a la totalidá sían refugaes”, esplicó Ángel González.

González puntualizó, con ironía, “nun saber el tiempu que-y va llevar al PP dixerir esa propuesta de Gabino de Lorenzo yá qu'a xulgar pol tiempu invertíu güei nel recesu de la Xunta de Voceros, esa primer dixestión paez que-y ta costando enforma trabayu”.

IX va revisar tol presupuestu con detalle y los órganos de dirección asitiaránse sobre cuál va ser la opción del grupu parlamentariu y sobre la enmienda a la totalidá o enmiendes parciales. “Lo que si ta claro ye qu'IX nun puede tar, de nenguna manera nes posiciones del Partíu Popular”.

González esplicó tamién qu'IX caltuvo dende l'entamu la mesma posición, la de facilitar la tramitación de la llei presupuestaria, entá nun tando acordies con qu'un Gobiernu monocolor rexistre na Cámara a principios d'avientu y proponga “un alderique a calzador”, cuando “tuvo tol tiempu del mundu pa la so ellaboración y si nun lu fixo antes foi porque nun quixo. La negociación de cuatro díes xustos con IX nun puede ser una escusa”. González recordó que nel so momentu IX aseguró qu'había una predeterminación, un xiru a la derecha, per parte del Gobiernu de Javier Fernández nel Alderique d'Orientación Política y nel refugu a la reforma electoral, viraxe que se vió nes declaraciones del Delegáu de Gobiernu”, dixo'l voceru d'IX a la salida de la xunta.

El calendariu aprobáu güei inclúi les comparecencies del Gobiernu na Comisión de Facienda de la Xunta pa la xunta de la ponencia de la llei a partir del día 10, en xornada de mañana y tarde, l'alderique de les enmiendes de totalidá'l día 20 d'avientu y el d'enmiendes parciales (d'aprobación final) el día 27 d'avientu.