L’escritor y dibuxante Albert Uderzo, coautor del célebre cómic Asterix, va demandar xudicialmente a la so fía y al so xenru por “violencia psicolóxica”, según anunció a la prensa’l so abogáu.

La fía d’Uderzo presentó una demanda xudicial escontra persona desconocida por abusu de debilidá respectu al so padre. Esti nuevu episodiu inscríbese nun conflictu familiar qu’entamó en 2007, cuando Sylvie Uderzo y el so maríu Bernard de Choisy fueron despidíos pola editorial Albert René, que publica les hestorietes d’Asterix, fundada tres de la muerte del coautor de la serie, René Goscinny.

Sylvie Uderzo, que s’oponía a la venta de la editorial al grupu Hachette, que se fizo efectiva en 2008, presentó una demanda por abusu de debilidá, acusando a ciertos miembros del equipu del padre, güei de 86 años d’edá, d’aprovechase del so estáu de salú pa influyir na xestión de la so obra y de la so fortuna.

Albert Uderzo desmitiera siempre que sufriera estáu de debilidá dalgún. Asina, declaró recientemente que nunca s’esperara dalgo asina y qu’esta demanda ye una ewpecie d’acosu que llevaba tiempu sufriendo.