Son malos datos pal presidente Nicolás Maduro. A seis meses d’asumir el cargu, les cifres difundíes nesti día pol Bancu Central confirmen que Venezuela transita la peor crisis económica de la última década. Trátase d’un escenariu qu’escuez porque combina una mui alta inflación y tases de crecimientu que disminuyen en dellos sectores y estánquense n’otros.

Güei, una selmana depués de que’l Congresu-y confiriera poderes especiales pa llexislar por decretu durante un añu, Maduro va anunciar una serie de midíes nueves pa facer frente al bastiáu, ente les ellecciones municipales del 8 de payares, consideraes el so primer gran test ellectoral. Pero los empresarios muéstrense escépticos y critiquen al unísonu la marcha cada vez más ecntralizada y estatizada de la economía local.

Según los números del Bancu Central, nos tres primeros meses del añu’l crecimientu acumuláu ye del 1,4% escontra 5,6% nel mesmu periodu del añu anterior. Si namás s’observa’l tercer trimestre, l’avance ye de malapenes un 1,1% escontra 5,5% del añu pasáu. La cifra terminó por echar per tierra los enfotos del Gobiernu de medrar un 6% esti añu, talamente como fixara nel so plan de presupuestu. Pero, al mesmu tiempu, disparóse la velocidá cola qu’aumenten los precios: la inflación amuesa yá un blincu de 49,4% ente septiembre de 2012 y septiembre d’esti mesmu añu. Y les previsiones ye que va superar dafechamente’l 50% a fin d’añu.

L’escenariu abisiegu produzse dos selmanes depués de que Maduro llanzara tol pesu del Estáu escontra miles de comercios, a los qu’ordenó, baxo amenaza de prisión, reducir hasta’l 70% los sos precios de venta. D’aniciu, la ofesiva –llexitimada pola Llei Habilitante o “superpoderes” concedíos pol Congresu- alcanzó a ellectrodomésticos, pero depués extendióse a ferreteríes, vestimentes y otros productos.

Maduro afirma que’l Gobiernu ta baxo una “conspiración de la oligarquía capitalista” que quier acabar col so Gobiernu y que llevó la inflación a una tasa añalizada de 54%, la más alta del continente y una de les más elevaes del planeta. En paralelu, atribúi al empresariáu la responsabilidá pola acuciante escasez de productos de consumu masivu. Venezuela importa cásique tolo que consume y pa eso necesita dólares. Maduro afirma que los empresarios obtienen la divisa a tasa oficial y llueu revéndenla nel mercáu paralelu por un valor diez veces superior.

FOTO; Minci.gob.ve