Una comunidá n’alta mar, metanes de la nada, ensin echar l’ancla nenyures. Eso ye lo que pretende una empresa afitada en Florida col so proyectu Llibertá: una ciudá flotante con capacidá pa 40 mil persones y que diba tener tolo necesario pa vivir allonxáu de la tierra firme.

Sicasí, ye una idea que necedita pa ponela en marcha una inversión de 10 mil millones de dólares y la innovadora visión d’esta entidá tendrá de dir acompañada de la inversión de socios. Una nueva ufierta que propón facer vida circunnavegando’l mundu a les persones más pudientes.

El buque diría constar de 25 plantes, pa una milla de llargu y un pesu de 2,7 millones de tonelaes. Unes característiques que-y diben impidir arribar a cualuquier puertu. La vuelta al mundu vendría ser cada dos años y diba permitir a los residentes disfrutar de les meyores ciudaes del mundu. La nave Llibertá ta concebida pa pasar el 70% del tiempu n’amarre y l’otru 30% en tránsitu ente los países.

Si’l proyectu saliera alantre prevé que parta de la costa este d’Estaos Xuníos nel mes de xunu y cruce l’Atlánticu hasta Europa. Llegaría, coincidiendo colos meses de branu al norte d’Escocia y baxaría pola canal de La Mancha hasta aportar a Xibraltar, p’acceder al Mediterraneu. Les vacaciones navidiegues coincidiríen col pasu de la urbe flotante pol norte d’África, dende onde descenderá hasta Sudáfrica. El próximu destín sedría Australia, coincidiendo colos últimos meses del branu nes Antípodes. Depués sedría’l turnu d’Asia y el Pacíficu.

Na recta final del segundu añu de travesía, la comunidá entraría nuna vuelta por América, averando a les principales ciudaes llatines, enantes de tornar a los Estaos Xuníos. Los ciudadanos d’esta plataforma tendrán a disposición aviones na cubierta que podrán averalos a tierra firme nel casu que lo precisen.