Ismael González Arias.- El programa Vínculos lleva faciéndose dende l’añu 2005 y llevó a los miembros de la Orquesta de Cámara de Siero por países tan estremaos como Brasil, Bolivia, Hondures, Guatemala, Nicaragua o Marruecos. Nesta pasada edición la formación llevó al acabu’l so programa en Grecia. Fue a lo llargo del mes d’agostu d’esti mesmu añu. Acompañólos xente de la productora Jabuba Films. El resultáu del so trabayu acaba de ganar el Premiu de la Crítica RPA al Meyor Videoclip del Añu. Pue vese en http://www.youtube.com/watch?v=gDWv9hQcdRk

Jabuba Films ye una productora de Salamanca, independiente, qu’ufierta servicios qu’abarquen la más amplia gama de productos audiovisuales y multimedia: curtiometraxes, social networking, campañes de comunity management, videoclips, flasmobs… y un llargu etcétera.

De payares d’esti añu ye la producción d’un domental sobre’l Camín de Santiagu, como del mes anterior la coproducción del documental Generación No Hunger y el videoclips “Kontyles”, tamién pa la OCAS, sobre una pieza tradicional del este de Creta interpretada pola orquesta xunto a Mihalis Stavrakakis y Ioannis Petrakis, sobre un arreglu d’Alberto Lozano y baxo la dirección de Manuel Paz.

Na concesión del Premiu destacóse la guapura de les imáxenes, la sensación de tranquilidá que destilen y la fuerza qu’aporten al trabayu desinteresáu d’estos músicos asturianos p’afondar nuna cultura como la Griega, un país al que toparon sumíu na más grande de les crisis. Y, con too, la cultura sirvió de vínculu pa xunir esta oriella del Cantábricu cola oriental del Mediterraneu.