Por más de les preocupaciones qu’arrodien de contino l’ámbitu del llibru, los datos qu’ufierta l’informa “El sector del libro en España 2011-2013”, nun parecen tan pesimistes. Arriendes de que l’estudiu nun contemple les ventes de los canalaes non tradicionales, como tiendes on line, tanto de llibros físicos como dixitales.

Según l’informa, cada español llee una media de 11,1 llibros en 2012, frente a 10,3 en 2011. Lo qu’indica que la salú nun ye tan mala y apunta a que quiciás güei se lleea enforma más que va diez años.

Lo que sí baxa ye la producción editorial. N’España, esti descensu anda ente’l 5 y el 8%. Como tamién baxó’l númberu mediu d’exemplares de cada edición: la tirada media descendió de los 3.420 exemplares, en 2002, a los 1.345, en 2012. Una cayida que podría desplicase pola suba del preciu mediu, un 17,5% nos últimos diez años. Asina, un mesmu llibru, “Los hombres que no amaban a las mujeres”, de Stieg Larsson, pue costar 3,5 veces más n’España que nel Reinu Xuníu.

Un retrocesu que se siente particularmente en llugares como Asturies, ye la cayida del mercáu internu, por mor de la crisis económica qu’anicia en 2007 y de la que los efectos más graves aportaron en 2009. Les cifres d’esti retrocesu son d’un 13% nos últimos tres años n’España. Pero, n’Asturies, estes cifres son mayores no que cinca’l mercáu en llingua asturiana, cola desaparición d’importantes empreses nesti curtiu periodu.

Otros datos que se desprenden de la encuesta ye que desciende’l mercáu de la distribución, mantiénse’l númberu de llibros compraos y el llibru de bolsín sálvase de la crisis. Tamién cabe señalase que nestos últimos tiempos diérase un fuerte impulsu a los llibros dixitales. Y, como datu esperanzador pa un sector que nun tenía les coses mui clares cola arrivada del llibru ellectrónicu: caltiénse’l llideralgu de la llibrería como puntu de venta. Si bien la facturación total descendió un 12,3% nos últimos tres años.