Por Ismael González Arias.- Enxamás acabó de marchar del too. Pero, Jorge Tuya llevaba una temporadina allonxáu de los escenarios competitivos. Tiempu asgaya –como agora comprobamos-, pa que la xente lu echara de menos. El que sigue a pie de butaca enm directo los principales concursos de tonada, sabe de qué tamos falando. Jorge Tuya vuelve a lo grande, a participar dende abaxo nes grandes cites del xéneru, y a llevantar de los asientos al públicu como acaba de facer esti sábadu pasáu nel Llar de Returbiu, onde se cellebraba la cuarta eliminatoria del Concursu de Canción Asturiana Cuenca del Caudal.

Fuera una tarde enforma baxa de nivel. Entamara bien cola presencia de la gaitera Belén Arboleya, qu’interpretó a la giata de Pablo Carrera les pieces “Anda y señálame un sitiu” y “Carretera de Cualloto”. Depués d’una llarga travesía, aportó al escenariu la natural del conceyu Liliana Castañón. Dos tonaes-y bastaron pa ganase al públicu, les dos a la gaita, “Agua que lleva l’arroyu” y “Nun sé qué siento mio Asturies”.

Pa, detrás de too, p’acabar con too, el presentador Alberto Cienfuegos llamar al escenariu a Jorge Tuya y facese un silenciu enorme ente’l públicu presente. Un públicu que sabe que’l que va cantar ye ún de los grandes, un clásicu en vida, Dalguién del que van poder dicir col pasu de los años: yo sentí cantar en directo a Jorge Tuya.

Dos tonaes tamién fueron asgaya pa que la xente marchara suficientemente contenta de nun tener perdida la tarde. A pelo, ensin acompañamientu nengún, “Nun pueo subir al puertu”. Depués, al delláu de Pablo Carrera, “A to ventana”. Naquel momentu la xente yá sabía que Jorge Tuya yera’l VI Premiu de la Crítica RPA a la Meyor Voz del Añu 2013. A nadie-y cabía la menor dulda. Bien que se notó nos aplausos.