Asturies.-Cientu siete persones d'once países (Alemaña, Arxentina, Brasil, Chile, Costa Rica, España, Estaos Xuníos, Irlanda, México, República Dominicana y Uruguay) formalizaron la inscripción nel cursu de llingua asturiana «Falar y más falar», dirixíu a les comunidaes asturianes nel esterior y que ta entamáu pola Dirección Xeneral de Política Llingüística, en collaboración col Conseyu de Comunidaes Asturianes y la Dirección Xeneral d'Emigración.

Esti cursu, de 60 hores lectives, desenvuélvese na modalidá de formación a distancia y tien una orientación sobre manera práctica. Nos sos conteníos recuéyense los rudimentos y normes básiques de la escritura correcta del asturianu, faciendo posible un acercamientu prácticu al so usu n'ámbitos cotidianos: el trabayu, el mediu urbanu, la comida, el mercáu, los viaxes, les tecnoloxíes nueves? Pa la realización d'esta actividá formativa cuntóse cola collaboración del Institutu Asturianu d'Alministración Pública Adolfo Posada, que va habilitar los medios técnicos pa poner el material didácticu del cursu a disposición de les persones matriculaes.

Esta acción ta incluyida nel conxuntu de midíes desenvueltes pol Gobiernu d'Asturies pa favorecer l'usu social del asturianu, la so protección y promoción, respetando siempres los principios de llibertá y voluntariedá  nel so usu por parte del ciudadanos.

FOTO: Festexu nel Centru Asturianu de París