Asturies.-El Senador de FORO, Isidro Martínez Oblanca, intervino nel plenu del Senáu pa defender una propuesta d’adición a una moción pola que s’insta al Gobiernu a l’adopción de determinaes midíes pa la meyora del usu de les llingües españoles n’Alministración del Estáu.

Na so intervención Oblanca destacó que “el Gobierno nun ta adoptando nenguna midida cola llingua asturiana, actuando ente la pasividá, la indiferencia y el desconocimientu, incumple claramente la carta Europea de les llingües rexonales y los requerimientos del Conseyu d'Europa no referente a la llingua asturiana”.

“¿Sabíen ustedes que los conceyales asturianos nun pueden usar la so propia llingua nel ámbitu de l'alministración? ¿Sabíen que nun pueden usala en plenos o comisiones? ¿Sabíen ustedes que l'artículu 86.1.2 del Reglamentu d'Organización, Funcionamientu y Réxime Xurídicu de les Entidaes locales zarra-yos esa puerta; nun contempla esa posibilidá: nun-yos garantiza esi derechu? ¿Sabíen que los conceyales que usen l’asturianu en plenos y comisiones incumplen la llei? ¿Ye esa una defensa afayadiza de la pluralidá llingüística y de la riqueza idiomática d'España per parte de l'Alministración del Estáu?", entruga Oblanca.

El senador recuerda que “va unes selmanes en Mieres del Camín, un policía local punxo una multa d'aparcamientu alegando que'l documentu taba n'asturianu. ¿Y cuál foi la solución? Acabar colos permisos redactaos n'asturianu: muertu'l perru, acabóse la rabia. Esa paez ser la estratexa de munchos: muertu l’asturianu, acabóse la rabia”.

“La indefinición de les normatives estatal, la Constitución nel artículu 3.2, y l'artículu 4 del Estatutu d'Autonomía orixina una indefensión de los ciudadanos. Acabemos con esti sinsentíu d'una vegada. Y fagámoslo dende'l sentíu común y el respetu a la normalidá”, sentenció Oblanca.