Anque diferentes resoluciones de les Naciones Xuníes y del so Conseyu Xurídicu prohiben a Marruecos facer usu de los recursos naturales del Sahara Occidental, a lo llargo d’estes cuatro últimes décades l’expoliu fuera permanente, cola collaboración de grandes multinacionales y de distintos países ya instituciones internacionales, ente elles la Xunión Europea.

Los caladeros saharahuis son una de les zones pesqueres más importantes del mundu. El 90% de la pesca d’altor de Marruecos concéntrase n’agües saharahuis, que tan sufriendo una auténtica sobreexplotación qu’amenaza cola desaparición de varies especies. El 2006 la Xunión Europea suscribió un alcuerdu pesqueru con Marruecos qu’inclúi, de manera inxusta ya illegal según les citaes resoluciones, les agües saharahuis. España resulta asina’l orincipal beneficiariu d’esta sobreexplotación de los recursos saharahuis. Delles grandes empreses españoles mantienen negocios cola potencia ocupante, como l’atunera Calvo que cuenta con una factoría n’El Aaiun, o Rianxeira y Mercadona.

Los fosfatos son la principal mercaduría d’expoliu del Sahara Occidental. Marruecos controla la más grande parte de la producción mundial gracies a la explotación de les mines de BuCraa, de les que salen añalmente más de 3 millones de tonelaes, teniendo bien d’elles como destín España, en concreto, Avilés y Xixón, al traviés d’empreses como FMC Foret, cola collaboración d’otres, como la naviera ERSHIP. Tamién lleguen estos fosfatos a México, Colombia, los Estaos Xuníos o Nueva Zelanda.

En 2006, la empresa norteamericana Kerr-McGee renunció a renovar el so contratu pa la prospección petrolífera nel Sahara Occidental. Marruecos intenta dende entós alcontrar empreses dispuestes a afrontar esta explotación.

Nin l’arena se llibra del explociu. El saquéu sistemáticu de Marruecos amenaza con provocar un auténticu desastre ecolóxicu. L’arena ye vendida a diferentes páises pa la so utilización na construcción o refuerzu de playes. Podemos topara, asina, arena saharahui nes sableres y playes de Madeira y Canaries.

Pa tratar temes como estros, a lo llargo de la última selmana de payares van tener llugar na Casa de Cultura Teodoro Cuesta de Mieres les Primeres Xornaes d’Alcuentru col Pueblu Saharahui, con películes y debates, asina como talleres d’henna o danza saharahui.