El cantante colombianu (con oríxenes familiares en Restrepu, Asturies) Carlos Vives resultó’l gran triunfador de la XIV edición de los Grammy Latino al upase con tres galardones: Meyor Canción del Añu, Meyor Canción Tropical y Meyor Álbum de Fusión Tropical.

La ceremonia de los Grammy Latino tuvo llugar esti xueves pasáu en Las Vegas (Nevada) depués de que l’Academia de la Grabación Latina anunciara los ganadores en 37 de les 48 categoríes existentes nuna ceremonia non televisada.

Carlos Vives ganó’l Grammy Latino como Meyor Álbum de Fusión Tropical por “Corazón profundo”. Enantes ganara na categoría Meyor Canción Tropical con “Volví a nacer”, tema qu’interpretó en vivo y qu’hores más tardes fue acoyida como Meyor Canción del Añu. Sicasí, el colombianu perdió en dos de les categoríes más importantes de la nueche ante Draco, yá que’l so discu “Vida” llevó’l premiu de Meyor Álbum del Añu y la Meyor Grabación del Añu fue pa Marc Anthony con “Vivir mi vida”.

Alejandro Sanz llevóse’l gramófonu d’oru a Meyor Álbum Contemporaneu Pop por “La música que no se toca”, un galardón que dedicó a Gabriel Abaroa, el presidente de l’Academia Latina de la Grabación, por persistir na cellebración a la música llatina. El cantante cantó’l tema que da títulu al discu nuna poderosa actuación xunto a estudiantes del prestixosu Institutu de Música de Berklee.

Ente los Premios a la Excelencia Musical recibiéronlos Pitbull xunto a Enrique Iglesias, Paquita la del Barrio, los salseros Oscar D’Leon y Eddie Palmieri, Palito Ortega, Miguel Ríos y Totó la Momposina. Nuna cena gala y conciertu-tributu la nueche anterior, Miguel Bosé fue nomáu Persona del Añu 2013.