Alfonso Zapico Fernández ye’l ganador de la quinta edición del Premiu «Alfonso Iglesias» de Cómic n’asturianu, que con una dotación de 3.000 euros concede la Conseyería d’Educación, Cultura y Deporte del Principáu d’Asturias.

El xuráu encargáu de valorar les obres presentaes xuntóse na mañana de güei, 20 de payares del 2013, na Viceconseyería de Cultura, baxo la presidencia de la directora xeneral de Política Llingüística, Ana María Fueyo Llaneza, y tuvo formáu por persones rellacionaes col ámbitu de la lliteratura asturiana: los autores de cómic Javier Marinas, ganador de la edición anterior del premiu, y Ruma  Barbero; l’escritor y guionista Chechu García y los técnicos en materia llingüística y educativa, Luis Casteleiro y José Luis Remis, respectivamente.

A esti galardón podíen presentase cómics d’estilu, tratamientu y tema llibres, escritos en llingua asturiana y con una estensión mínima de cincuenta páxines, siempre que fueren inéditos y non premiaos n'otros concursos.

Ente les obres presentaes, el xuráu decidió por mayoría conceder el Premiu al cómic tituláu Cuadernos d’Ítaca, destacando, como consta nel acta, «la profesionalidá que s’amuesa na obra d’acordies coles nueves tendencies europees». La obra presentóse col seudónimu «Capricornio». N’abriendo la plica, l’autor  ganador resultó ser Alfonso Zapico Fernández.

Alfonso Zapico (Blimea, 1981) estudió Artes Plástiques y Diseñu na Escuela d’Arte d’Uviéu, y trabaya como profesional gráficu dende l’añu 2006. Fizo ilustraciones, diseños, animaciones y campañes pa delles axencies de publicidá, editoriales o instituciones. Amás, ye ilustrador de prensa en diarios rexonales asturianos (La Nueva España, Cuenca del Nalón…).

Tien publicaos cuatro títulos de cómic (el álbum La guerre du professeur Bertenev y les noveles gráfiques Café Budapest, Dublinés y La ruta Joyce) arriendes de collaborar en delles obres colectives.

Nel pasáu añu 2012, Alfonso Zapico ganó’l Premiu Nacional de Cómic, qu’otorga’l Ministeriu de Cultura. Amás, ye ganador del «Prix BD Romanesque Ville de Moulins» (2007), y de los premios «Haxtur» (2008) y «Josep Toutain» (2010). Anguaño vive en Francia, onde trabaya en dellos proyectos de cómic.

Foto: EP/BOUTADE