Si lo que buscaba la compañía Kmart yera ser el centru d’atención, ensin dulda que lo tien consiguío estes Navidaes. Y ye que nos Estaos Xuníos recibió milenta quexes depués de la emisión d’esti anunciu que lleva por títulu “Show your Joe” y nel que se puen ver a unos homes interpretando un anunciu en calzonciellos con una parte que, anque nun se ve, ye inconfundible na so anatomía. L’anunciu nun lleva más que dos díes emitiéndose y el revuelu fue tan descomanáu que la empresa de ropa interior tien pidío disculpes, anque recalca que consiguió lo que pretendíen: llamar l’atención. Pue vese en http://www.youtube.com/watch?v=9PVhIMr4ScI

Nel anunciu pue vese a un grupu d’homes que parecen tar dando un conciertu de campanes ante un auditoriu. Namás se los ve de centura p’arriba hasta quye desaparez una gran cortina que-yos cubre les extremidaes inferiores. Pesie a dir arreglaos como pa dar un conciertu, l’espectador ve que toos ellos van en calzonciellos dafecho y que los instrumentos qu’utilicen pa tocar el villancicu son los sos propios tolanos.

L’anunciu, dún minutu de duración, fue programáu na televisión nacional estadounidense anque tamién va tener pases nos canales per cable. Pel momentu nenguna cadena manifestó la so intención de retiralu pesie a les numberoses quexes d’una parte de l’audiencia más conservadora, que considera vergoñoso l’usu sexista que se fai de cualuquier símbolu navideñu col aquel de vender.