Ángel González, voceru parlamentariu d'IX na Xunta Xeneral, amosó en calteniendo la primer xunta colos representantes de la FSA pa la ellaboración del presupuestu, la “gran esmolición” de la coalición pola falta de datos de la execución del presupuestu de 2013 y el cuadru en blancu” qu'hasta agora ye'l proyectu de presupuestos de 2014 qu'IX nun tien.

González punxo de relieve que'l Gobiernu unvió a IX la execución presupuestaria de gastos a 15 de payares demientres los ingresos son de fecha 31 d'ochobre. La coalición quier tener nes sos manos les previsiones d'ingresos del executivu autonómicu a 31 d'avientu, según la execución del anexu d'inversiones a día de güei, documentación de la qu'escarez pa podela analizar. Nesta negociación' tampocu la FSA nun apurrió nin los gastos nin los ingresos previstos pa 2014 por partíes nin el detalle de caúna d'elles, nin les previsiones d'emplegu públicu pal próximu añu, nin el balance de plantiyes del añu 2013 tantu de personal de plantiya como interín. “Malamente puede falase de presupuestos cuando nun los tenemos”, aseguró González.

González considera que la FSA y el Gobiernu nun tán cumpliendo “n'asuntos básicos y fundamentales”. Al so xuiciu los datos globales del presupuestu executáu son discutibles, pero hai  “asuntos bien graves” nos que nun se respeta lo negociao. Punxo como exemplu que'l presupuestu inclúi 14,5 millones d'euros pa planes d'emplegu y hasta la fecha executáronse 1,8 millones d'euros. “Esto ye rise de la xente que peor lo ta pasando”, alvirtió coles mesmes que punxo de relieve que la llista d'espedientes ensin resolver del salariu social xube a 6.000 persones, “esperando por él pa comer”

El voceru d'IX tamién alvirtió que ye “poco esplicable” que'l Gobiernu lleve tres meses preparando'l presupuestu y qu'a les organizaciones polítiques a les que nos llamaron a axustar tengan “pocu más de trés o cuatro díes”, una cuestión que nun considera “seria”. Asina mesmu, alvirtió al respective de declaraciones del Secretariu de la FSA mientres la fin de selmana, que'l programa d'IX nun la censura, modula o prioriza naide. "Ye tan válidu como'l de cualesquier otru partíu y vamos caltener el so defensa". González remató espresando la voluntá d'alcuerdu de la coalición pero tamién espresó la so disconformidá col métodu y el conteníu. “Nun podemos faer teatru nin engañar a los asturianos”, esplicó ante los medios de comunicación. La próxima xunta va ser el miércoles pela tarde.

Al plenu d'esta selmana na Xunta Xeneral, IX va llevar una interpelación sobre la execución presupuestaria en 2013.